Chunding Enggau Aki Selumba

-Jerita Jenaka-

Chunding enggau Selumba

Tusun ke 8

Baka buah merunjau ulu,

Baka langkau enda ngipak kedampa,

Ko jaku ka berimba padi paya..

Bumai enda lama laban ke lebu..

Bakanya mih Chunding enggau aki iya selumba. Ko jaku berambi ka bala sida rampu, entekai, selau, enggau macam utai ka ditanam ba umai bukit seduai tang lain ke nyadi. Pengaga ati meda utai ke dibaie tadi nyadi pengelebu. Naka pengelelak seduai ke berangkut ka guni rampu be san ke selabit ngema uyut ari umai datai ke tebing ai alai nambat perau tadi. Pengelelak nadai diganti penguntung. Pulai seduai mina maie berapa igi aja rampu, entekai enggau utai bukai. Mina sayur ensabi kira selamat mimit laban ke dalam guni. Utai bukai ambis ketepak baie labuh ke ai laban perau ke cecangak ngelantak tebing.

Gaga mih anak ati tudah Kempi meda wai sulu iya Selumba datai ngema uyut. Bisi mih utai ko anak ati iya. Nyadi mih utai ke ditanam.

Bedau nyingkang kaki ke anak tangga, Kempi lalu nanya.

"Nyadi rampu, entekai enggau semua utai tanam tua ba umai wai sayauku bie...?"tanya Kempi.

(Nya dinga kita nya rumintik seduai iya au...bie)

Panjai tuchum Selumba, lelak tadi lalu lenyau. Sapa ga enda gaga pia, dikangau ke bini bie.

"Nyadi sayauku buah rampu manah udu, tang sayau ambis empa tengiling tesat ari nanga sunging. Bebelat ba umai tua lalu makai entekai. Agi lepi perut empa iya labu. Nya mih tu aja kngka ka ulih baie kami duai uchu. Ensabi baru mayuh bisi dikasam,"ko Selumba nunjuk ka utai ke dibaie. Nyadi udu ngemula ke bini laban ke enggai di anu bini.

Chunding ke ari belakang tetucum geli ati ninga Kempi nganggau ke Selumba bie.

"Aaaaihh dih, antu. Tau nibuh pan. Ngengebie kutai. Lembau ngengebie kutai ke nyau udah nadai ngeli wai, maya nya umur nemu nitih ka ulah nembiak rebak diatu. Aku ke bujang terang tan tang tu enda bebie. Pahai dayah,"pia ko Chunding bejaku kediri ari belakang.

"Bisi ngaga ai kupi tadi bie...? Ehh, salah. Inik pia iya. Salah sebut inik,"ko Chunding nundi Kempi. Sigi sengaja kebatang endar laban ke agi geli ati ninga siku nya ke ngebie ke Selumba tadi.

"Au aa..bie udah aus tu,"ko Selumba ga sengaja ka ngasuh Chunding pedis gi ati. Tang mua tetucum.

"Eeeihh, hampang aaa. Kin alai, tama pangking....!! Ka luput ku ninga nya. Nibuh ngirup nuan nya encangur, udah bendar ngirup ai dalam ai pagi tadi," ko Chunding lalu ngikir ketawa.

"Iya lapa nya munyi nya dih igat...? Nama ga ta ngirup ai sungai..? Ambis ai ke dibekal ke aku ke seduai tadi pia bie...?tanya Kempi.

"Eeihh, ka enggau utai dadak nya.

Nemu nuan tadi, iya nya nyetat injin sepit naka alah nguing ke perau. Tudah aku nyau besungin labuh ke ai empa pengelaju perau ka bejalai laban iya. Baka anak uduk ke baru nemu nyemerai tudah aku niki ke jelatung. Rerunguk ngetat ke anak cauk ke basah. Semakau nyau tegelung bai kelalu jempuk. Gegetak celap. Tu pulai tadi nyau cecangak ga perau dilantak ke tebing,"pia ko Selumba.

Lalu melut mata Kempi ninga utai tusi Selumba.

"Apuuuuuu.....! Aruh mih gamal utai ke dibaie seduai nyau bakatu pendiau. Nyau baka mua seduai ke tambab nya. Kemula ke nuan aku tu tadi Umpau. Tengiling nyadi mangsa sangka makai utai tanam. Keruan utai dadak...! Lalu angat mita injin tudah Kempi. Andal ke utai tanam mayuh dibaie pulai tang ambis laban penadak Selumba enggau Chunding.

"Nih, nyamai. Ungkup bangat ilal. Sapa ngasuh nusi. Ipak ilal, nyin baie kepangking alai. Aum dedin ngambi enda nganu. Nadai bie agi, hahaha...hahaha...!! Nyamai kangau ke urang Umpau....? Jeha asai nuan Umpau. Ka mandi aku, jaga nuan aki Umba pangka ke indu paga legi. Nya utai ko aku suba,"ko Chunding nundi aki iya Selumba.

Rerinyik tudah Selumba ninga Chunding munyi nya. Ngaru pala enda gatal.

"Ukum seduai, pagila meseti ka nurun ke kebun semak rumah tu nanam jagung ba kebun lada dedin,"ko Kempi meri ukum ngagai seduai meucu nya.

Enda bemunyi tudah Selumba. Ka pan enda, bini udah bejaku.

********************************************************************

Tumu Selumba dani pagi nya. Peda iya Kempi bebela di dapur nyedia ke pemakai pagi. Chunding nadai dipeda, nyangka agi bekuruh dipangking. Mansang iya agai Kempi begadai. Pejalai sengaja dilubah ka ngica ka enda didinga rejat. Niat ati ka merap ari belakang. Ka begauk indah ko anak ati laban demalam ke udah dipelakang ka bini tinduk ringat ke buah rampu, entekai enggau sayur bukai ke abis rusi laban seduai meucu.

Ada dasur ke Selumba jari merap Kempi ari belakang. (Agi rumintik au).

Enda memukai.....

Tuk...!!

"Aaaakaaaaaii....akai.....akai.....!! Nama utai tu kini....? Nama utai medis pala aku tu..? Enda patut tingang taie cicak medis tu." Bepeling asai pala. Dua tiga utai dipeda. Mua Kempi nyadi tiga peda iya.

"Aaapuuu....nuan tadi pia yayau...? Lapa nuan tak enda madah kediri nya nuan tadi dih...? Nyaaa...enda semetuk pala tengkuk enggau idus(Sudu)? Ba anang empelah dih begauk mayatu jam,"pia ko Kempi murus pala Selumba.

Kempi narit jari Selumba lalu nuduk ke siku nya atas mangku. Ambi iya minyak angat cap burung lalu diunsut ba pala Selumba.

Enda lama udahnya, dinga darup kaki tudah Chunding. Selumba sigi udah tembu nyedia ke perengka kena nurun ke kebun. Danji ke betanam ke jagung dikinsil. Laban ke ka ngumpul lada.

pagi nya enda entu manah mood Chunding. Lembau pendiau.

"Unding....! Lapa nuan enda engkeretik...? Angkat ambi tangki pemancit. Nuan mancit aku ngumpul igi lada. Nyau bauh rumput babas dia peda aku...."pia ko Selumba ngangau ke Chunding.

Sekali ngangau enda ibuh, kedua kali enda ga ibuh, ketiga kali enda liat ati perak iya penapat inat.

"Ooo....encabuh...!!!! Nyin tangki pemancit ambi dalam langkau. Nn mancit aku ngumpul igi lada....! Ko aku, ninga nuan ilal..." perak Selumba.

"Apuuu....aki tu! Legi asai nuan. Nibuh nyangkung urang seberai nyin ngangau ke aku," saut Chunding. Palik iya tunga agai tong deram kena nambun ai.

Tumpu iya tong deram nya lalu bebelat mih deram nya nuju Selumba.

Selumba ke meda nya, enda beapai enda beindai ke lari ke baruh nuju pegung alai ngerendam lada, lalu nerejun kediri ke pegung.

Chunding ke meda nya, ketawa meda Selumba muai diri ke pegung. Enda ga iya nyangka tadi deram nya ngelaju nya bebelat.

Sesengah tudah Selumba ke belanda tadi. Basah mih dih tudah tuai. Iya ga bau bangar ai pegung nya. Pedis ndar ati iya agai Chunding.

Seari-ari nya iya ringat. Makai tengah ari dipelakang ka iya Chunding.

Pulai ke rumah enda mih nanya Chunding. Makai lemai pan enda mih bejaku. Sapa ga enda ringat jara!

********************************************************************

Seminggu udah nya.....

Pemansau padi benung manah, tau diketau. Selumba begaga ke ketap, nyilup sintung ke dikerit cit enggai ke nadai ditangkin kna ngetau padi.

Nurun mih sida tiga meucu ya dih, ngetau padi bukit. Naka pemanah padi, nadai rebah nadai dikacau utai. Nangka pengerindu ke ngetau. Nyepi nyau enda alah, dia Kempi nyau berunding ka beduruk tauka ngaji urang enggau ngetau.

Pulai sida tiga ari umai, Kempi betanya agai Indai Cik. Ka maie beduruk. Indai Cik setuju ka beduruk lalu maie nuruk bala kebukai.

Nama agi dih mujur mih sida sebuat beduruk. Umai Indai Cik laban ke semak rumah enda kelalu tumu sida ke nurun ke umai. Capuh riuh ragak mih sida sebuat. Gaga kediri beduruk bumai. Rindu bebuti enggau pangan diri.

Chunding, enda bemunyi ngetat ke perut ti pedis. Selumba tadi dulu ke sungai ngetan bubu.

Leka ke Chunding Sintung, buka karung jari leka ke ketap. Padi dal sintung dituang dalam guni.

Enda jauh ari ai endur Selumba ngetan ke bubu dia alai Chunding duduk jejuie neran ke pemaie iya.  Chunding enda meda Selumba, Selumba pan enda meda Chunding. Laban ke lindung pun kayu siti.

Selumba, meda ai ke enda entu manah alai ngetan bubu dia iya berunding ke mindah ke bukai ngetan bubu.

Nyadi ke jerita, musim nya musim apai nyamun kenu ke jerita ti dibaie angin. Sapa ga enda takut jara.

Ninga utai nyau semetak, munyi babas dipansa urang bejalai. Dia Chunding lalu nenangi dih ati iya. Takut!

Begaut narit tancut pia ke belanda.

"Apai nyamun....!! aaapai nyamun....!! Lari...! lari kitai, parai pumpung apai nyamun pala...! Pia ko Chunding rerauh pia ke belanda lari.

Malik magang bala sida ke ngetau tadi ninga Chunding ke munyi nya. Sapa enda takut jara. Leka ke sintung, bisi nya maie sintung mih lari, bisi nya teterap tetingkap mih lari. Lari ke apai nyamun ke dipadah ke Chunding tadi. Enda beapai indai lari naka alah mih belanda. Chunding ke pama agi enda bebasu burit ke baru udah bira tadi. Naban ke taie mih nya.

**********************************

*Lengka ke aku angka tu dulu au bla madi. Bisi maya aku nampung baru.. Amat apai nyamun kini kelari ke sida nya? Ila kitai sama nmu au.. Arap ke teperindang maca"

*betampung ke 9*

Dikarang : Endu Dara Rimbu/John Jovi