Ki Waja nyieun acara

Qin Gang buburu nitah pembantuna mawa cai anu dimaksud. Mangkok anu eusi cai dijampéan ku Ki Waja bari dipurulukan menyan. Geus kitu ramona dianclomkeun kana cai, terus dikepretkeun Kana beungeut Qin Gang.

Qin Gang ngusap beungeutna anu baseuh ku saputanganna. Tapi ngagebeg nempo ruang tamu ayeuna kawas anu dipinuhan ku haseup hideung.

"Aya naon ieu Ki?" Ceuk Qin Gang reuwas.

Qin Gang ogé nempo beungeut anakna Auxe jeung Steven siga zombie, pias pikasieuneun. Tapi nempo beungeut Ki Waja mah normal.

"Kuring geus muka mata batin anjeun. Anu katempo ku anjeun ayeuna nyaéta aura mistis anu ngahaja dikirim ku jelema jahat" ceuk Ki Waja.

Qin Gang ngadegdeg, dirina sieun.

"Kudu kumaha Kuring Ki?" Ceuk Qin Gang nanya bari sorana ngageter.

"Anjeun teu kudu hariwang, éta urusan kuring. Untung kuring didieu. Nasib anjeun alus kénéh" ceuk Ki Waja ngayakinkeun Qin Gang.

Ki Waja ngaluarkeun 3 jimat persis jeung anu geus dibagikeun ku dirina di palélangan. Dibikeunan hiji-hiji ka Qin Gang, Auxe jeung Steven. Bari nutup deui mata batin Qin Gang.

Bari narima jimat ti Ki Waja, lalaunan tetempoana Qin Gang normal deui. Qing Gang beuki yakin kana kakuatan isim anu ayeuna aya dina leungeunna. Saterusna Qin Gang nyarita,

"Anggeuskeun Ki, tuntaskeun masalah Kuring. Kuring sanggup mayar sabaraha waé anjeun ménta"

Ki Waja némbalan,

"Hiji jimat 5 juta, tapi teu cukup ukur keur aranjeun tiluan hungkul. Kabéh pagawé anjeun ogé kudu maké. 3 ieu ku kuring digratiskeun. Tapi sesana kudu dibayar"

Qin Gang ngadayagdag nyarandé leuleus kana korsina. Kabeh pagawena ampir 900 jelema. Hartina 4,5 mikyar kudu dikaluarkeun keur meuli jimat bari can tangtu kabéh pagawéna percaya kana isim.

Nempo bapana cicing, Steven nyarita,

"Ceuk Kuring ogé naon pa, si Udin ukur tukang tipu. Duit bapa béak dipaké balanja di palélangan lewih ti samilyar. Kudu buburu dilaporkeun ka pulisi"

Auxe kerung, sabab Auxé mah malah ngarasa anu keur nipu justru Ki Waja. Hal éta sabab Auxé nganggap Udin ukur jelema bodo, ngomongna ogé saperluna, kajujuranna babari katoong. Béda jeung Ki Waja anu geus kolot jeung loba pangalamanna, leuwih hésé nebak eusi haté sarta kalicikanna.

"Manéh ngajedog!" Ceuk Qin Gang ambek ka Steven. Terus malik ka Ki Waja.

"Nuhun Ki, masalah keur pagawé, kuring butuh waktu pikeun mikir"

Ki Waja unggeuk bari seuri,

"Talian isim ti kuring, terus kangkalungkeun. Kuring pamit. Saupama anjeun geus siap, bejaan kuring" ceuk Ki Waja terus pamitan.

Ti mimiti ngaléngkah asup ka Imah Qin Gang, sabenerna Ki Waja geus bisa ngarasakeun ayana aura gedé anu asalna tina barang luhureun panto anu kaliliwatan. Saolah-olah Imah Qin Gang keur dijaga ku mahluk anu teu katempo. Ngan ku sabab panasaran, Ki Waja ngahaja mancing Qin Gang sangkan balaka timana asalna barang éta. Saeungeus nyaho yén éta keretas anu asalna ti Udin, Ki Waja mimiti ngarasa gimir ku Udin. Sabab kakuatan keretas nyatana jauh leuwih kuat tibatan isim jieunan dirina.

Sabab Ki Waja leuwih mentingkeun dunya. Matak ngahaja teu nitah Qin Gang miceun keretas tapi méré isim. Harepanna sangkan Qin Gang yakin yén kakuatan éta asalna tina isim ti dirina, padahal anu sabenerna mah lain. Tapi tina keretas jieunan udin. Lamun Qin Gang geus yakin. Bakal babari pikeun Ki Waja meres harta Qin Gang.

Bari ngaléngkah kaluar. Saacan indit, Ki Waja ngarandeg heula dina lawang panto. Kakuatan keretas dina luhur lawang anu karasa nimbulkeun rasa sieun anu gedé dina haténa. Jadi Buburu ki Waja ngagedig indit sangkan kasieunna teu katempoeun ku Qin Gang.

Saenggeus Ki Waja teu katempo deui, Steven nyarita,

"Pa, Ki Waja geus kawéntar. Teu bisa dibandingkan jeung si udin. Ki Waja geus daék ngabantu sarta méré 3 isim gratis. Sedengkeun si Udin geus méakeun samilyar leuwih tanpa méré bantuan nanaon, jelas bapa keur ditipu"

Qin Gang teu némbalan, haténa mimiti kapangaruhan ku omongan Ki Waja jeung Steven. Teu lila satpam imah asup bari mawa amplop,

"Juragan, ieu dikintun ku ojég"

Qin Gang buburu narima amplop terus dibuka. Dijerona aya kartu ATM anu kudirina dibikeun ka Udin jeung kulit kerang buleud ipis sagedé duit récéh. Qin Gang yakin éta kiriman ti Udin. Amplop diketrukeun kana méja, bisi aya deui barang séjénna. Nyatana mémang aya, nyaéta Keretas sacuwir jeung tulisan sagurat. Terus dibaca,

"Gantung di ruang tamu keur ngusir pangaruh jahat"

Steven nempo Udin ukur mulangkeun kartu jeung kulit kerang sagedé bénggol langsung koméntar,

"Dasar tukang tipu, mulung timana barang kieu patut! Mana kerang jeung mutiara anu tadi dibeuli di palélangan? Samilyar ukur jadi kieu?" Ceuk Steven bari nunjuk kana kulit kerang jieunan Udin.

Saterusna Steven nyarita deui,

"Pa, hayu bawa pangawal. Urang pénta deui duitna. Lamun si Udin kabur. Bakal hésé deui néanganna" ceuk Steven ngajak bapana bari nangtung.

"Sia ngajedog heula, aing ogé keur mikir" ceuk Qin Gang bari nyokot kulit kerang terus ditempoan. Teu katingali kaanéhan nanaon.

Qing Gang ahirna ngomong ka Auxé jeung Steven,

"Ieu masalah hirup jeung paéh kulawarga urang. Isukan bapa rék ngadatangan pa Udin pikeun ménta penjelasan sarta rék ngamimitian maké isim ti Ki Waja. Lamun pa Udin teu bisa méré penjelasan, kapaksa bapa rék make cara kasar"

"Kuring milu pa, si Udin geus ngawiwirang kuring di palelangan. Kuring hayang miteskeun sukuna" ceuk Steven.

Qin Gang muncereng,

"Kawas anu heueuh siah. Gelut ogé teu becus. Tapi lamun bener rék milu bawa pangawal. Ngan ulah gagabah, lamun masalahna can jelas, ulah ngahaja ngajieun masalah tiheula"

Steven unggeuk. Qin Gang ngomong deui,

"Sanajan kulawarga urang can kungsi nyiptakeun masalah. Tapi lain hartina kudu cicing. Teu bisa ngantep tukang tipu. Tukang tipu kudu dibales. Lamun kabukti pa Udin nipu. Bapa moal bisa ngahampura"

Saenggeus balik ti Imah Qin Gang, Ki Waja langsung ngajieun rencana. Ki Waja ayeuna geus nyaho kakuatan Udin, tapi lain hartina kudu mundur. Kerang tetep kudu bisa karebut. Ahirna Ki Waja boga niat rék ngajieun hiji acara, sarta bakal ngondang sababaraha jelema beunghar jeung ahli-ahli kabatinan di Bandung. Pikeun ngawiwirang Udin ku cara ngadu élmu. Sabab lamun disinghareupan ku gelut, Ki Waja teu yakin bakal meunang. Lamun acara ieu sukses, ngaran dirina bakal lewih kaangkat jeung dipikasérab ku batur.

Saperti biasa, pasosoré Udin kudu ka pasar deui, meuli sayuran keur dahareun Peuting. Karék oge saboséh sapédahna maju, teleponna disada. Pas di tempo, singhoréng telepon ti Warni. Jadi buburu ku Udin ditarima. Kadéngé sora Warni,

"Pa Udin, Ki Waja parantos ngulem jalmi-jalmi ti golongan ahli ramal, métafisika, ahli barang pusaka sareng kolektor barang antik kanggé ngahadiran acara anu bakal diayakeun ku anjeuna di bumina kulawarga Wijaya. Pa Udin hoyong ngahadiran?"

"Di kulawarga Wijaya?" Udin nanya bari kerung. Sabab sakanyaho Udin kulawarga Wijaya kuduna geus bangkrut, indungna Ibro geus dipenjara. slFredi geus balik ka Australia, Salman ogé gering stroke, sedengkeun Ibro kuduna masih dirawat di rumah sakit. Ngan teuing kétang ayeuna mah. Udin mémang can nyaho kumaha kaayaan kulawarga Wijaya ayeuna.

Warni némbalan,

"Muhun, kulawarga Wijaya. Anjeuna keluarga kelas menengah. Kagungan 2 putra pameget, Ibro sareng Fredi. Upami pa Udin badé sumping. Ke dikenalkeun ku abdi"

"Naha acarana bet didinya?" Udin nanya panasaran.

Warnia ngajelaskeun,

"Ahir-ahir ieu kulawarga Wijaya seueur nampi cocobi. Usahana sababaraha kali bangkrut, nyawa anggota kulawargana ogé dina bahaya. Sababaraha kali kacilakaan nimpa ka anggota kulawarga. Malih ibuna dugi ka ayeuna masih di penjara. Kumargi hal éta, kulawarga Wijaya ngulem Ki Waja supados linggih di bumina salami aya di Bandung. Nanging abdi curiga ondangan Ki Waja ieu ngahaja kanggé sarana meres artos kulawarga Wijaya sareng ti uleman sanésna"

Udin buburu némbalan,

"Lain, acara ieu pasti di targétkeun ka kuring sabagé upayana pikeun males dendam. Sabab Kuring geus ngawiwirang Ki Waja di palélangan. Jadi, Kuring pasti datang"

"Upami pa Udin teu acan uninga bumi kulawarga Wijaya, enjing ku abdi dijemput. Urang angkat sasarengan" ceuk Warni.

Isukna Warni geus datang ngajemput Udin. Duanana langsung indit ka imah Wijaya. Imah Kulawarga Wijaya aya di suku gunung anu jauh ti kota. Pamandanganna éndah jeung hawana tiis. Imahna gedé sarta pakaranganna ogé lega, malah di pakaranganna anu lega aya hiji talaga jieunan sagala.

Di sisi talaga éta puluhan korsi kai geus ngajajar rapih. Belasan tamu nyampak geus dariuk bari ngarobrol saruka bungah. Sabaris korsi anu leuwih hadé ogé geus ngajajar nyinghareup ka para tamu. Jajaran korsi éta keur dariuk tuan rumah sarta Ki Waja anu boga acara. Anu diuk di tengah sarta nyekel iteuk ngaranna Salman Wijaya, bapana Ibro jeung Fredi. Salman diuk ngarendeng jeung Ki Waja.

Salian ti jelema-jelema éta. Udin ogé nempo aya Alan jeung mang Gugun anu ti Garut tea. Nempo Udin jeung Warni datang. Alan nangtung bari manggut seuri. Salman Wijaya ogé ngarérét tapi ku teuteupan ceuceub. Anu jadi sabab lantaran Ibro jeung Fredi kungsi dicilakakeun ku Udin. Salman teu nyahoeun lamun asupna pamajikanna ka penjara jeung bangkrutna usahana ogé gara-gara Udin. Lain ku Bima Raya saperti anu salila ieu jadi kayakinan dirina.

Barda anu geus aya didinya ogé buburu manggut ka Udin jeung Warni.

"Ndén Warni, pa Udin. Salira duaan ogé hadir?"

Udin unggeuk bari seuri,

"Enya. Kuring hayang lalajo acara Ki Waja sacara langsung. Lain ukur dina TV"

Saurang lalaki gigireun Barda nanya,

"Anjeun anu meuli kerang samilyar téa?"

Ditémbalan ku Barda,

"Enya, ngaranna pa Udin"

Sabab perhatian tamu pindah ka Udin anu karék datang, Salman Wijaya kasinggung terus nyarita,

"Mémangna naon kahébatan pamuda éta anu ukur bisa meuli kerang samilyar. Didieu aya Ki Waja anu boga acara, leuwih pantes dipihormat"

Kabéh tamu langsung jempé sarta narempo deui ka hareup. Lain pédah sieu ku omongan Salman. Tapi mémang ieu acarana Ki Waja, lain acara Udin.

Ki Waja nangtung,

"Teu nanaon. Kuring mémang nginjeum tempat didieu pikeun ngayakeun acara ramah tamah, silaturahmi pikeun ngaraketkeun hubungan saprofési. Kabéh pada resep kana hal anu sarua. Tapi dina hal saha anu leuwih unggul. Di ahir acara bakal kaciri, didinya hayu urang pada némbongkeun jimat pangabogana séwang-séwangan sarta kaunggulanna"

Sabab Warni teu nyaho yen Udin kungsi aya masalah jeung kulawarga Wijaya. Ngadéngé omongan Salman jeung Ki Waja anu nyapélékeun ka Udin, Warni mimiti yakin yén acara ieu memang ditargétkeun ka Udin. Tapi asa piraku, sabab Udin mah pan teu katémbong mawa nanaon. Jimat naon anu kudu ditémbongkeun? Dugaan Warni pasti acara ieu buntut tina acara lélang. Ki Waja hayang males kaérana ka Udin. Udin pasti bakal diwiwirang di dinya.

Tapi Udin sorangan haré-haré, komo deui kalolobaan jelema anu hadir can wawuh. Jadi buburu néang korsi kosong keur diuk.

Ki Waja diuk. Giliran Salman anu nangtung, terus Salman nyarita,

"Kuring ngarasa kahormat tempat Kuring bisa dipaké keur acara ngumpulna jelema-jelema anu luhung ku élmu jembar ku pangabisa. Kahiji kuring hayang wawuh, kadua kuring ogé hayang diajar ka para guru anu geus hadir didieu. Sarta hayang nyaksian kahébatan jimat anu dipiboga ku masing-masing"

Saurang tamu ngacung nanya,

"Naon anu rék dipamérkeun dina acara ieu salian jimat?"

"Kuring ogé can pati ngarti, bisa waé tingkatan sihir tina barangna. Ki Waja anu bakal ngajelaskeunna" ceuk Salman terus diuk deui.

Ki Waja nangtung deui,

"Aturanna saderhana, aya 5 Élmu dina métafisika. Aranjeun cukup némbongkeun salah sahiji jimat atawa barang pusaka unggulan aranjeun, terus pilih lawan anjeun. Kulawarga Wijaya geus nyadiakeun hadiah, keur anu meunang 50 juta, anu éléh 5 juta. Kumaha, satuju?"

Kabéh tamu silih rérét, tapi ahirna unggut-unggutan. Kabéh satuju sabab aya hadiahanna. Jelema anu icikibung dina métafisika biasana ukur ngalakukeun sagala rupa sorangan, ngulik pangabisana sorangan, jarang anu guguru. Jadi moal aya anu bisa ngukur kamampuan barang batur. Poé éta kabéh bakal nunjukkeun barangna jeung kamampuan tina barang. Aya dua kauntungan, salian jadi nyaho barang andelan anu dipiboga ku batur, tapi éléh-meunang tetep bakal meunang hadiah.

"Acara pamér barang jeung kamampuan barang?" Ceuk Udin ngagerentes sinis,

"Jelas Ki Waja ukur hayang némbongkeun yén barang anu dipibogana leuwih unggul"

Kadéngé Salman ngomong deui,

"Sabab Kuring yakin anu hadir kalolobaana jelema aya. Duit hungkul sigana moal cukup. Kukituna kuring ngarobah aturan. Salian hadiah ti kuring, Anu meunang boga hak ngajabel barang ti anu éléh. Naha barang pusaka, jimat atawa anu séjéna. Kumaha?"

Udin seuri, sabab geus kabaca ti saméméhna lamun Ki Waja hayang ngajajal dirina. Saupama Udin éléh, Ki Waja pasti bakal ménta kulit kerang.

Kabéh tamu euweuh anu némbalan satuju. Sabab satiap barang boga kaleuwihan jeung kakuranganna. Masing-masing jelema jadi asa-asa, sabab sieun kanyahoan kakurangan tina barang milikna. Jadi para tamu loba anu diskusi jeung tamu séjénna antara miluan jeung henteu.

Nempo para tamuna malah ngarobrol sorangan. Salman ahirna ngomong deui,

"Kabéh tenang! Ki Waja ogé geus mikiran, dunya métafisika mémang geus loba kamajuan. Anu saacana nyebar sorangan-sorangan, ayeuna geus dihimpun jadi sababaraha kolompok. Malah aya anu disebut ikatan paranormal Indonesia. Tah didieu, naon salahna réngsé acara urang ngajieun kumpulan sorangan. Tapi anu jadi pamimpin tetep kudu anu boga barang pangunggulna. Euweuh cara séjén salian ti némbongkeun kaleuwihan tina barangna"

Sawaréh tamu ahirna nolak pikeun ulubiung. Tapi aya sababaraha tamu anu nyatujuan. Anu satuju lantaran kabongroy ku duit jeung kakawasaan. Hartina aya 3 hadiah anu geus ditawarkeun keur anu meunang. Duit, barang rampasan ti anu éléh jeung jabatan pamingpin.

Sedengkeun anu nolak ogé sarua boga alesan. Asa teu perlu ngajieun kelompok, teu perlu ogé nunjukeun kasaktian barangna ka batur, jeung teu kabéh anu hadir jelema anu gumantung kana barang.

Nempo aya 2 pendapat, ahirna Ki Waja nyokot kaputusan saolah geus teu sabar,

"Kuring teu maksa. Lamun aya anu sieun, ulah maju. Anu wani, sok témbongkeun"

Udin tetep cicing teu ngoméntaran nanaon. Tapi ukur gogodeg nempo ambisi Ki Waja anu mémang kaleuleuwihi, ngajieun acara silaturahmi anu ditungtungan ku mamérkeun kasaktian barang sarta rekt nyieun kolompok métafisika. Bari di Bandung, lain di lemburna sorangan. Jadi Udin ukur rék lalajo, moal pipilueun.

Ki Waja nyarita deui,

"Panangtang bisa maju tiheula pikeun mamérkeun barangna, kenalkeun ngaran barangna terus sebutkeun ngarang anu ditangtang. Aya anu wani maju?"

Saurang lalaki umur 40 taun maju. Langsung ngaluarkeun batu hurung warna héjo stabilo, terus ditémbongkeun ka sararéa bari nyarita.

"Kuring Yayan, ti Padalarang. Kuring rék langsung nangtang Ki Waja" kituna teh bari manggut ka Ki Waja.

Kabéh tamu keprok. Ki Waja ogé keprok bari seuri.

Yayan ngajelaskeun batu anu dicekel ku dirina,

"Batu ieu dicokot tina hamperu buaya. Bisa ngaramal nasib, ngadatangkeun bencana alam bisa ogé dipaké keur ngirim teluh"

Ki Waja anu ditangtang ogé maju terus nangtung gigireun Yayan bari manggut heula ka Yayan.

"Batu éta mémang alus, tapi saenggeus némbongkeun kasaktiana, batu éta bakal jadi milik kuring. Sabab barang kuring leuwih hadé" ceuk Ki Waja bari ngaluarkeun gulungan kaén hideung, kaén dibébérkeun, dina kaén aya gambar simbol-simbol anu dijieun tina mangsi warna emas.

Nyambung....