Udin nulungan Warni

"Boyo, anjeun jeung kuring sarua, ngarasa karunya ka néng Warni sarta hayang nulungan. Keur daérah Jawa Timur, mémang dukun anu aya di jero bisa disebut jago. Tapi ieu pan Jawa barat, hadéna ditulungan ku ahli ti urang Sunda ogé" ceuk kang Bahar.

"Tetep Kuring teu bisa ngijinan anjeun asup. Kecuali aya jangji heula jeung Ndén" ceuk Boyo keukeuh.

Kang Bahar gagaro teu ateul, saterusna nyarita deui,

"Boyo, anjeun kungsi nyaho dukun ti Banten anu nasibna goréng saenggeus datang ka Bandung? Tah éta kusabab salah tempat. Élmuna ukur matih di daérahna sorangan. Jadi kuring ogé teu yakin lamun élmu dukun Banyuwangi bakal matih didieu. Ngarti teu anjeun?"

Boyo unggeuk, sabab Warni ogé kungsi nyaritakeun. Élmu Ki Waja teu matih dipaké nambaan Qin Gang jeung Salman Wijaya. Malah ahirna nyawana tamat di Bandung. Ahirna Boyo unggeuk,

"Nya hayu atuh ari kitu mah, tapi tungguan dukun ti Banyuwangi méréskeun heula pagawéanna, ulah waka di ganggu. Lamun manéhna teu mampu, kakara akang maju. Kumaha?"

Kang Bahar unggeuk nyanggupan sarta buburu turun tina mobil dituturkeun ku Udin. Duanana dititah nungguan di rohangan tamu. Bari nungguan, Udin panasaran nanya ka Bahar,

"Kang, kunaon nyinghareupan Boyo akang bisa sabar. Piraku raja préman éléh debat ku saurang palayan?"

"Lain Kitu pa, Kuring ngahargaan néng Warni, lamun lain pagawé néng Warni, titadi geus papisah sirah jeung awakna ku kuring" jawab Bahar bari seuri.

Teu lila Boyo datang deui terus ngajak naék tangga ka lantéi 2 sarta ngajugjug ka hiji rohangan anu pantona muka. Rohangan éta kamar saré pribadi Warni. Dijero nyampak aya saurang lalaki begang umur 40 taunan keur nangtung ngacungkeun keris kahareup bari leuleumpangan gegerenyeman sarta rurat rérét kaditu kadieu kawas keur aya anu ditéangan.

Sabab sakanyaho Warni di imahna salian dirina ukur aya Boyo. Jadi pas ngadéngé aya anu asup, Warni anu keur nukangan panto langsung nanya,

"Boyo, Aya naon?"

Boyo némbalan,

"Ndén, ieu kang Bahar sumping nyandak pa Udin saurna badé ngiring ngabantos méréskeun masalah Ndén"

Ngadéngé aya Udin, Warni curinghak atoh, buburu malik terus seuri,

"Guru, kunaon anjeun kadieu?" Warni nanya bari nitah Udin jeung kang Bahar dariuk. Boyo mah kaluar deui.

Udin ngagebeg nempo parobahan dina awak Warni, padahal karék sababaraha poé teu panggih. Matana carelong jeung rada begang. Udin museurkeun tanaga jerona kana tetempoanna sangkan nyaho kondisi Warni anu sabenerna. Terus Udin kerung. Mémang aya anu teu bérés, sabab pamor Warni rada aleum.

Udin némbalan,

"Kang Bahar méré nyaho ka kuring yén anjeun keur aya masalah. Terus ngajak kuring kadieu"

Lantaran aya jelema séjén anu rék pipilueun nulungan Warni, dukun anu keur nyekelan keris nyarita teu suka,

"Néng Warni. Jelema anu teu ngarti nanaon ulah pipilueun bisi jadi panghalang kana tarékah kuring"

Warni nyaho Udin ngarti élmu, tapi teu nyaho kaasup jenis naon élmu udin. Anu jelas teu sarua jeung dukun. Sabenerna Udin jeung dukun bisa digawé babarengan. Tapi Warni teu hayang aya anu kasinggung. Jadi warni ngarérét ka Udin,

"Hapunten guru, mangga antosan di handap deui. Upami pa Legi parnatos réngsé, tangtos salira diwartosan"

Sabab inget kana pesen kang Bahar sangkan milu nalingakeun Warni, Udin némbalan,

"Warni, béda jelema béda cara, sabab anjeun babaturan kuring, ijinkeun kuring tetep didieu. kuring moal pipilueun. Kuring hayang lalajo heula kana cara anu dipaké ku pa Legi ieu. Lamun masalahna bisa dibéréskeun, tangtu kuring ogé milu bungah. Tapi lamun henteu, kuring anu bakal méréskeunna"

Ngadéngé omongan Udin, Legi protés.

"Kuring ngadukun lain sataun dua taun. Anjeun karek borojol kuring geus ngadukun. Masalah anu kieu mah perkara gampang" pokna bari ngasupkeun keris kana carangkana terus diselapkeun dina cangkéngna.

Ngadéngé omongan Legi jiga anu kasinggung dibarengan ku nada omonganna anu sombong, Udin teu kasinggung, tapi seuri.

"Sok teruskeun pa Legi, kuring moal ngaganggu"

"Bener pa Legi, teruskeun" ceuk Warni ka Legi.

Legi anu masih nangtung ngaluarkeun kanjut kundang. Terus nyomot bubuk menyan anu dikodok tina jero kanjut kundang diawur-awurkeun ka kabéh juru rohangan sababaraha kali bari terus gegerenyeman. Terus ngarandeg dihareupeun tangkal bonsai anu aya deukeut jandéla. Terus nyarita,

"Neng Warni. Nyatana masalahna aya didieu, jandéla ieu nyinghareup ka wétan tempat datangna cahaya panon poé isuk-isuk. Lawang rejeki anjeun kahalangan ku bonsai ieu"

"Jadi kudu digeserkeun atawa dipiceun bonsaina?" Ceuk Warni nanya.

Legi némbalan,

"Teu kudu, cahaya panon poé ukur simbol, bonsai ogé ukur simbol. Jadi lawang rejeki mangrupa jandéla anu kahalangan ku bonsai ogé simbol. Aya cara séjén pikeun nganétralisir pangaruhna"

"Kunaon pa?" Ceuk Warni nanya deui.

Legi ngaluarkeun batu hideung tina tasna saukuran endog puyuh.

"Ku ieu néng, batu ieu kudu ditunda dina pot bonsai. Tapi kuring ngan ukur boga hiji, sarta hargana mahal"

Warni katembong atoh jeung Surti kana maksud Legi,

"Sabaraha hargana pa? Teu nanaon mahal ogé ku kuring dibeuli"

Legi ogé katembong bungah,

"Sanajan ukur batu, tapi ieu sabenerna batu mustika anu dicokot tina hamperu oray cobra, teu kabéh hamperu oray aya mustikaan. Mustika ieu ogé ku kuring geus dipuasaan salila saminggu. Jadi 150 juta geus cukup keur maharna, bubuhan ka anjeun, keun baé 100 juta wéh"

Warni seuri bari buburu nulis cék,

"Duit teu masalah keur kuring" ceuk Warni bari mikeun cék ka Legi.

Legi narima cék terus ditempoan, terus ditilepkeun diasupkeun kana sakuna.

"Isuk pasti geus katempo hasilna" Ceuk Legi seuri bari nunda batu hideung dina pot terus sila hareupeun bonsai bari gegerenyeman lila.

Warni ngarénghap panjang ngarasa reugreug ngadéngé omongan Legi. Sabab geus sababaraha poé Warni teu tibra saré sarta mineng ngimpi goréng. Ditambah sababaraha kali cilaka jeung usahana ogé loba masalah. Anéhna kajadian ieu karasa ti saprak ulang tauna anu ka-24. Matak Warni ngahaja ngondang Legi, dukun anu geus dipercaya ku Kulawarga Nataprawira.

Nempo kalakukan Legi, Udin ukur seuri. Dina haténa mah lain ukur seuri, tapi nyakakak bari gugulitikan. Sabab ngarasa lucu ku polah Legi pikeun ngahasilkeun duit gedé bari teu kudu capé. Lian ti éta, Udin ogé nempo anu dilakukeun ku Legi lain ngaleungitkeun masalah anu aya, tapi justru nambahan ngadatangkeun masalah anyar.

Bieu basa sararéa fokus merhatikeun Legi. Ngolebat dina pikiran Udin saolah-olah aya anu nitah pikeun ngaluarkeun kai kaboana. Matak ku Udin buburu kai kaboa anu sagedé curuk dikeupeul dina leungeun katuhuna bari nyalurkeun énérgi spiritual tina awakna. Hal anéh langsung karasa.

Panon Udin saolah keur lalajo dua TV dina hiji layar. Anu hiji TV berwarna, anu hiji deui TV Hitam-Putih. Anu berwarna némbongkeun kahirupan alam nyata anu aya di kamar éta, anu Hitam-Putih némbongkeun kahirupan alam séjén tapi masih di kamar éta kénéh.

Dina tampilan alam séjén, Udin ogé kakara ayeuna ngalaman. Udin nempo yén di kamarna Warni aya siluman oray bodas anu keur gugulusuran kaditu kadieu hayang bijil ngaliwatan jandéla, tapi kahalangan ku tangkal bonsai. Basa Legi nunda batu hideung dina pot, anu katempo ku Udin batu hideung éta mangrupa siluman oray hideung anu ayeuna nyicingan bonsai. Matak Udin tadi seuri, nempo Legi teu ngusir oray bodas. Malah nambahan nunda oray séjén. Jelas masalah keur ditambahan deui ku masalah.

Ngan Udin can nyaho, Naha Legi ngahaja, atawa mémang teu nyaho jeung teu ngarti. Udin bisa nulungan, tapi nungguan paréntah ti Warni. Jadi samentara kaayaan diantep heula bari nyaksian kajadian saterusna.

Wajar rejeki Warni seuseut da teu bisa asup lantaran aya énérgi jahat tina oray bodas di kamarna. Wajar ogé Warni teu bisa saré, mineng ngimpi goréng sarta mineng kacilakaan, sabab oray anu kakurung di kamarna teu daék cicing, terus-terusan ngaluarkeun énérgi gangguan sangkan bisa kabur ti kamar. Saupama siluman oray bodas éta teu buburu diusir, nasib Warni moal aya robahna.

Bonsay anu dipiboga ku warni nyaéta Caringin anu dikerdilkeun. Caringin hiji simbol kahirupan jeung kakuatan. Énérgina jadi pager anu leuwih kuat tibatan énérgi anu dipiboga ku siluman oray. Matak pantes oray teu bisa kabur da kahalangan. Kakurung di jero kamar.

Batu ogé simbol kakuatan, batu hideung anu ditunda ku pa Legi secara langsung nambahan kakuatan bonsai Caringin. Parahna, batu hideung éta aya eusian nyaéta siluman oray hideung. Ayeuna jadi aya 2 siluman di kamarna Warni. Anu nyicingan bonsai, Jeung anu mémang geus aya saacanna sarta kakurung jeung terus adug-adugan di kamar hayang kabur.

"Néng, pagawéan kuring geus réngsé" ceuk Legi ka Warni.

"Hartina kuring ayeuna geus aman?" Warni nanya.

"Aman néng, teu kudu salempang deui" témbal Legi.

"Terus kangkalung kuring anu leungit bisa kapanggih?" Warni nanya deui.

Legi kawas anu bingung,

"Ngalacak barang leungit lain kaahlian kuring néng"

Beungeut Warni katémbong kuciwa,

"Nya teu nanaon, hatur nuhun kana bantuana pa" ceuk warni bari manggut

Teu lila aya telepon asup kana HP Warni, buburu ku Warni ditarima. Anu nelepon sékrétarisna ti kantor.

"Bu aya masalah deui"

"Aya naon?" Warni reuwas.

"Éksport ka Amérika parantos dibongkar tina kapal, nanging dianggap teu layak margi qualitasna dibawah standar kontrak. Janten sadaya barangna dimuat deui kana kapal badé dirétur. Perusahaan urang diklaim kedah ngagentosan kompénsasi karugelan 3 kali lipét tina nilai kontrak"

Warni colohok reuwas,

"50 ton kabéh ditolak? Kuring geus ngaluarkeun ratusan juta keur transportasi jeung mayar béa cukai, ditambahan nilai barang anu ahirna teu jadi duit sabab dirétur. Jelas bakal jadi karugian gedé?"

Warni bingung, sabab karék cikénéh Legi ngomong masalahna geus réngsé. Tapi malah narima béja aya deui masalah anyar di perusahaanna.

"Nataprawira Group kedah ngagéntosan kompénsasi 3 kali lipet. Kedah kumaha bu?" Ceuk sékrétaris.

Warni némbalan,

"Coba telepon fihak pakait di Amérika. Bisi aya kasalahan dina pamariksaan barang, ménta di cék deui"

Sékrétarisna némbalan,

"Parantos Bu, 2 kali tést kualitas barang. Nanging hasilna tetep dibawah standard"

Warni nyarita deui,

"Coba cék catétan ti sumber barang, tingali tanggal produksina, téang saha anu tanggung jawab masalah packaging. Hasilna béjaan kuring. Téangan ogé pangacara terkenal di Amérika pikeun nguruskeun masalah ieu"

"Mangga Bu" Témbal sékrétaris. Telepon ahirna ditutup.

Warni ngahuleng bari melong ka Legi,

"Pa Legi, kunaon masalahna can bérés? Bieu Kuring narima deui béja goréng, usaha kuring keur nyinghareupan karugian ampir 5 milyar"

Legi ngabalieur, teu wasa nempo pencrongan panon Warni,

"Prosésna butuh waktu néng, kuring pan geus nyebutkeun. Isukan kakara bakal katempo hasilna"

Warni teu panuju ku jawaban Legi,

"Tapi ieu masalah anyar pa, kuduna teu langsung kawas kieu pan?"

Teu lila Warni narima telepon deui, ayeuna telepon ti Hongkong. Buburu Warni nanya,

"Halo. Hongzhi aya naon?"

Hongzhi némbalan,

"Nona Warni, kuring ngarasa kuciwa ku kerjasama antara perusahaan kuring jeung perusahaana anjeun. Kapaksa kuring mutus kontrak sacara sapihak. Hampura"

Paroman beungeut warni langsung pias. Terus nanya,

"Putus kontrak? Hongzhi perusahaan kuring leuwih unggul tina sagala aspék dibanding kompetitor séjén. Naha bisa kieu?"

Hongzhi némbalan deui,

"Kuring ogé teu yakin, tapi bapa kuring ahli Féng Shui, sarta ngabéjaan yén kaayaan anjeun ayeuna keur dina masalah gedé. Kuring embung kababawa rugi" Saterusna telepon ditutup.

Legi kaciri mimiti geumpeur, sabab teu nyangka panarékahanna malah mawa apes keur Warni. Fikiranna jelas hayang buburu pamitan terus kabur.

"Tingali isukan wé néng, lamun euweuh parobahan. Telepon kuring, ayeuna kuring pamit" ceuk Legi terus nangtung.

Warni ngacungkeun leungeunna,

"Ke heula pa, Kuring teu ngarti kunaon masalahna bet nambahan? Coba jelaskeun heula ka kuring"

Karék ogé parat nyarita, beuteung Warni karasa ngusial. Warni muringis nahan rasa peurih nyelekit dina bagéan handap beuteungna.

"Aya naon deui ieu, kuring teu boga panyakit kieu saacanna" ceuk Warni ngomong sorangan bari terus muringis. Késang tiis kaciri langsung maseuhan tarangna.

Warni nyobaan nangtung bari muntangan kana TV anu napel dina tembok. Tapi awakna teu bisa ajeg. Malah TV anu dipuntangan lesot tina brakétna hampir ninggang sukuna lamun leungeun Warni teu buburu di kenyang ku Udin.

Lantaran leungeuna dibetot nyakaligus, awak Warni ngagaléong kana lahunan Udin baréng jeung ngagubragna TV kana lantéi kamar anu dijieu tina papan jati. Bitis warni anu bodas kapetelan ku beling jeung palastik peupeus anu mancawura tina TV.

"Ah!" Ceuk warni ngajerit, sabab aya kaca anu nanceb kana bitisna.

Udin buburu nyabut beling tina bitis warni terus ngarawél sababaraha lambar tisu tina méja pikeun nutupan bitis warni anu soéh tur getihan. Panon Warni mencrong ka Legi

"Pa Legi, lamun anjeun teu bisa ngajelaskeun anu asup akal. Kuring teu ngijinan anjeun indit"

Bahar langsung nangtung ngarawél kerah baju Legi.

"Naon anu geus dilakukeun ku anjeun? Ngomong!"

Legi muringis sieun,

"Kuring teu ngalakukeun nanaon, ngan nganétralisir bonsai ku batu sangkan jalan rejeki kabuka deui"

Bahar molotot,

"Anjeun teu bohong? Atawa mémang ngahaja nipu sangkan batu anjeun dibeuli 100 juta? Jawab!"

Legi ngadégdég,

"Henteu pa, kuring lain dukun tukang tipu"

"Lamun sia teu jujur, ulah nyalahkeun aing lamun sia diasupkeun kana kandang ajing" ceuk kang Bahar beuki ambek terus ngalieuk ka Warni.

"Néng, pasrahkeun jelema ieu ka akang, urang leungitkeun nyawana"

Warni nyarita ka Legi,

"Pa Legi, buru jelaskeun ka kuring, ulah maksa kuring masrahkeun kasalametan anjeun ka kang Bahar"

Legi ahirna unggeuk,

"Ampun néng, Kuring mémang bohong, kuring sabenerna teu ngarti nanaon. Tapi batu éta mémang asli mustika kobra, ngan kuring teu nyaho manfaatna. Masalah duit, bisa dipulangkeun lamun anjeun ngarasa rugi"

"Anjeun nipu kuring?" Warni ngayakinkeun.

Legi unggeuk, bati ngodok sakuna ngaluarkeun cék,

"Bener néng, ieu cék ti anjeun bieu. Ku kuring dipulangkeun deui. Leupaskeun kuring"

Warni narima cék tapi teu nyarita nanaon deui sabab karék sadar yén dirina masih aya dina lahunan udin. Jadi buburu Warni ngoréjat nangtung. Diukna pindah kana korsi kosong bari tungkul éra terus nempoan tatu dina bitisna anu geus ditutupan ku keretas tisu.

"Néng, sabenerna Legi teu ngalakukeun nanaon" ceuk Udin.

"Maksadna kumaha?" Warni kerung.

Udin sabenerna hayang nyaritakeun sacara jelas ayana siluman oray bodas di kamar Warni. Ngan kusabab sieun Warni teu percaya, jadi teu dibeunyeur béaskeun,

"Aya hal ghoib anu ngahalangan rejeki anjeun jeung nyilakakeun kasalametan anjeun" ceuk Udin terus ngarérét ka Legi.

"Hanjakalna Legi geus nunda batu hideung dina pot bonsai anu ngajadikeun pangaruh goréngna beuki rosa"

Warni langsung deku hareupeun Udin,

"Guru, hapunten abdi teu émut salira kagungan kamampuan ningal hal ghoib. Bantos abdi guru"

"Pa Legi, cokot deui batu hideungna!" Ceuk Warni ka Legi.

Udin gogodeg,

"Percumah, énérgina geus ngahiji jeung bonsai"

Bahar nyarita ka Udin,

"Dén, bantuan néng Warni. Kuring yakin adén bisa"

Udin unggeuk, ngahuleng sakeudeung. Terus ngalieuk ka Warni,

"Minggu ieu ulang taun anjeun pan? Salahna basa ngarayakeun ulang taun, anjeun kaliwat bungah, anu ngajadikeun hawa négatif datang nyampeurkeun. Nyeri dina beuteung anjeun datangna tina ménstruasi. Lain tina masalah nanaon"

Warni colohok, nyaho timana Udin kana ulang tauna? Jeung mémang geus waktuna dirina datang bulan.

Udin nanya,

"Kuring bisa mereskeun, tapi bakal aya sababaraha parabot anu kudu pindah posisi jeung dibongkar. Anjeung ngijinan?"

Warni unggeuk,

"Sanaos bumi ieu kedah diruag, abdi teu kaabotan guru"

"Boyo! Kuring ménta linggis" ceuk Udin ka Boyo anu harita aya diluar kamar.

"Antosan pa" ceuk Boyo bari indit lumpat. Teu lila Boyo datang deui bari mawa linggis, terus dibikeun ka Udin,

Nyambung...