Udin katitipan duit

Udin ogé kerung, sabab lamun enya Rukmini ngirim jelema pikeun nyusulan dirina, kapaksa kudu disinghareupan maké kakerasan. Geus lila Udin nahan-nahan kaambekna ka Rukmini.

Icih ngadeukeutan panto,

"Saha di luar? Aya naon néangan salaki kuring?"

Udin metot leungeun Icih terus muka panto, diluar nyampak geus aya 3 urang lalaki, Udin nanya ka lalaki anu panghareupna,

"Anjeun néangan kuring?"

Lalaki saumuran Mardi anu ditanya buburu ngabongkokkeun awakna,

"Salira pa Udin? Abdi manager BCC anu énggal, abdi nembé di tunjuk tadi sonten ngagentos manager sateuacana anu parantos di pecat"

Udin kerung,

"Manager BCC anu ngayakeun acara pelélangan?"

Si lalaki unggeuk,

"Sumuhun pa, BBC parantos ngusir pa Dudung anu janten biang masalahna. Sareng BCC ngaraos manghajakalkeun kuayana pa Udin mulih deui anu ngajantenkeun acarana kedah dibatalkeun. Malih BCC kedah ngagentosan kompénsasi karugelan ka kulawarga Nataprawira. Abdi sumping kadieu seja neda dihapunten, mugia pa Udin tiasa ngahapunten"

Bérés nyarita kitu, 2 lalaki tukangeunna maju bari ngagotong karanjang parcel ukuran gedé terus di tunda di hareupeun Udin. Udin ngarérét eusina anu mémang ukur kahalangan ku palastik hérang, aya sababaraha barang seni anu aralus. Pas kembang, surutu Cuba, ukiran maung, hiasan batok kuya, jeung sajabana. Malah aya sababaraha botol inuman mahal. Ditaksir ku Udin hargana moal kurang ti 10 juta.

Si lalaki nyarita deui bari manggut jero,

"Pa Udin, Kumargi kalepatan murni aya di fihak BCC, ayeuna abdi nuju ngarencanakeun deui acara pelélangan salajengna sareng ibu Warni. Masalah waktos, Ibu Warni bakal sumping ngulem sacara pribadi nepangan salira sakantenan nangtoskeun waktosna. Ieu sakedik hadiah ti BCC kanggé salira, Mugi ditampi"

Udin unggeuk,

"Kuring ogé nganuhunkeun ka fihak BCC anu geus daék ngadéngékeun keluhan kuring sarta buburu ngarombak pangurus. Harepan kuring kahareupna, ulah tepi ka kajadian deui hal-hal anu teu di piharep, anu sifatna ngarugikeun tamu"

Manager unggeuk bari ngodok 2 kartu warna emas tina saku jasna, terus dibikeun ka Udin.

"Ieu dua kartu VVIP kanggé ngahadiri sagala rupi acara anu diayakeun di BCC tanpa batas waktos, BCC mung ngaluarkeun 10 kartu sapertos kieu, janten khusu kanggé salira, teu aya ondangan husus, cekap sumping ku kartu ieu. Abdi janji moal nguciwakeun salira. Pasihan abdi kasempetan kanggé nebus kalepatan fihak BCC"

Udin nempo kartu anu di cekel ku manager, nyatana lain ukur warnana anu emas, tapi mémang di jieun tina salambar emas. Mardi colohok atoh. Sabab kungsi ngadéngé aya jenis kartu all access anu jumlahnya ngan 10 berlaku keur saumur hirup jeung teu di jual beulikeun, teu nyangka 2 tina 10 éta ayeuna bakal jadi milik kulawargana.

Nempo Udin cicing waé, Lastri anu aya di gigireun Mardi maju bari langsung ngarebut kartu tina leungeun manager,

"Pa, kartu ieu bisa diséwakeun atawa digadékeun?"

Ngadéngé pananya Lastri anu ngérakeun, Icih buburu nyarita,

"Ulah ngisinkeun atuh ma!"

Tapi Lastri teu maliré kana tegoran Icih, buburu lastri nagog ngagusur karanjang parcel ti hareupeun Udin ka jero imah, terus anteng sorangan ngaluar-luarkeun barang ti jerona hiji-hiji bari di ilikan. Kalkulator dina otakna langsung ngitung harga 2 lambar kartu emas jeung barang-barang dina karanjang parcel, bari sura-seuri sorangan. Terus ngajepretkeun sababaraha foto Selfi ku HPna. Buburu di-postingkeun kana médsos jeung status WAna, 'rejeki nomplok kiriman ti BCC keur kuring'.

Ningali kalakuan Lastri kabéh pada ngarérét ka Lastri. Ngarasa dipencrong ku sararéa, Lastri nanya,

"Kunaon? Teu meunang ema narima hadiah ieu?"

Icih ngarahuh,

"Sanes Kitu ma, tadi Ema ngalepatkeun kang Udin, kang Udin teu acan nampi. Anu masihanna ogé masih ngadeg di dieu, tapi Ema tos maén bongkar waé. Ulah ngisinkeun atuh ma"

Udin buburu nyarita

"Baé nyi, akang geus narima, teu nanaon dibongkar ku ibu, sarua waé"

Haté manager langsung ngemplong ngadéngé omongan Udin anu geus narima hadiah ti manéhna anu tandana Udin geus bisa ngahapura kana kasalahan BCC. Ahirna manajer pamitan,

"Hapunten abdi tos ngaganggu salira, abdi seja pamit" ceuk manajer saterusna baralik.

Bérés nutupan panto, Udin malik ngarérét ka tukang, nyampak Lastri geus nangkeup sababaraha botol inuman mahal jeung kotak surutu cuba langsung dibawa ka kamarna. Udin ukur bisa gogodeg. Udin, Mardi jeung Icih dariuk deui. Sajongjongan kabéh ukur caricing. Teu lila kurunyung deui Lastri ti kamarna.

Udin nanya,

"Bu kadangu ku nyalira pan. Saha anu parantos ngadamel masalah di BCC?"

Lastri unggeuk,

"Enya. Ema ngadéngé, BCC ménta di hampura jeung méré hadiah ka anjeun. Hartina anu salah si Dudung"

Udin seuri,

"Tah, jelaskeun ka Nini. Ibu ulah gampang nampi pangaduan upami teu acan aya buktosna"

Lastri teu némbal tapi diuk di gigireun Mardi bari haténa ngarencanakeun isukan kudu indit ngajual surutu jeung inuman anu geus diampihan ku dirina bieu.

Udin nangtung ngaléngkah kana méja makan ngumpulkeun piring urut dahar terus di bawa ka dapur. Di dapur, Hp dina sakuna disada, nyatana telepon ti Qin Gang.

"Sareng Pa Udin"

"Enya, ieu Kuring" témbal Udin

Qin Gang bungah, buburu nyarita,

"Ku ayana bantuan ti anjeun, masalah-masalah di kulawarga kuring, utamana masalah gedé, hiji-hiji geus di béréskeun. Kukituna kuring rék nganuhunkeun pisan sabab saupama euweuh anjeun, kuring sorangan teu yakin masalah bakal bérés tanpa timbul masalah séjén"

Udin kerung,

"Karék ogé mangkukna pa, jeung ngarana ogé jelema hirup, tangtu moal leupas tina masalah. Kunaon kudu nganuhunkeun ka kuring, Kuring mah ukur nyaréatan"

Qin Gang nyarita deui,

"Perusahaan kuring ayeuna geus normal deui, anu tadina rugi jeung rugi. Ayeuna sababaraha pesenan barang mimiti daratang deui. Persis ti saprak kuring nyimpen keretas téa dina kusén luhureun lawang panto sarta nuturkeun pituduh ti anjeun. Wajar lamun kuring nganuhunkeun ka anjeun. Tapi..."

"Tapi naon?" Udin panasaran sabab Qin Gang teu neruskeun deui omonganna.

"Tapi tadi isuk, batu Voodoo anu di piceun ka walungan cikapundung ku anjeun nyaho-nyaho geus nyampak aya di hareupeun panto imah dina kaayaan geus beulah dua. Jelas anéh, jadi ku kuring batuna di ruang. Salametkeun kuring pa bisi kadatanganna mawa mamala deui" ceuk Qing Gang sorana laun bari ngadarégdég kawas anu sieun.

Saterusna Qin Gang ngajelaskeun,

"Saacana, anak kuring Steven teu ngahaja ngaragragkeun keretas éta sawaktu meresihan ramat lancah ku sapu. Budakna ku kuring geus diteunggeulan malah sapoé ieu mah di kerem di kamarna teu meunang kaluar"

Udin kerung,

"Mémangna aya kajadian naon saprak batu éta balik deui?"

Qin Gang némbalan,

"Tadi soré langit poék, terus aya guludug ngaguruh sababaraha kali bari dituturkeun hujan badag pisan, méméh hujan raat, aya béntar tarik pisan ngahantem tangkal kalapa nepi ka rubuh ninggang kenténg persis luhureun kamarna Auxé jeung ampir nyilakakeun Auxé. Ngan anéhna, hujan ukur di lingkungan imah kuring hungkul"

Udin ngahuleng, miturut bab Élmu Ramalan nu aya dina buku 9 Élmu Karuhun. Melak tangkal kalapa, palm, korma atawa sajenisna di buruan mémang hadé, sabab éta simbol kamakmuran. Tapi lamun geus di béntar gelap bari ninggang imah, hartina kulawarga anu nyicingan imah bakal ancur. Udin teu nyangka batu Voodoo boga kakuatan mistis anu luar biasa.

Lantaran Udin lila teu némbalan, Qin Gang ngomong deui,

"Tulungan deui kulawarga kuring pa"

Kakara Udin némbalan,

"Lain Kuring nolak, tapi jujur kuring ogé masih di ajar, ku kaayaan kuring ayeuna, kuring can sanggup pikeun ngalawan kakuatan gedé tina batu Voodoo anu datangna jauh ti Afrika bari tangtuna ogé geus di paké sababaraha kali keur ngalakukeun sagala kajahatan teluh. Kuring kudu ngabogaan heula barang anu boga kakuatan sabanding pikeun ngalawanna"

"Terus kudu kumaha atuh kuring?" Qin Gang nanya.

"Béré kuring waktu pikeun néangan barang anu dimaksud" témbal Udin.

"Mangga pa, Kuring réla ngaluarkeun harta anu aya sangkan pa Udin bisa néangan barangna" ceuk Qin Gang nunda harepan ka Udin.

Udin nyarita,

"Moal lila deui bakal aya paméran jeung lélangan barang di BCC, Kuring rék nempo, susuganan aya barang anu bisa dimanfaatkeun"

Qin Gang curinghak bungah,

"Oke, isukan kuring rék méré kartu ATM ka pa Udin, lamun aya barang anu perlu di beuli, sabaraha waé hargana, ulah asa-asa langsung beuli terus gésék ku kartu Kuring keur mayarna"

"Mudah-mudahan barang anu dimaksud aya. Lamun kabeneran aya, hartina éta mémang rejeki anjeun" témbal Udin.

Udin sabenerna embung ngaleuleuwihi katangtuan pangéran, naon anu dijelaskeunna éstuning sarua jeung piduduh anu aya dina buku 9 Élmu Karuhun. Tanpa dileuwihan atawa dikurangan.

Isuk kénéh Qin Gang jeung Auxé geus nyampak di sisi jalan hareupeun imah Mardi bari nungguan Udin kaluar ti imah. Teu wani nelepon atawa keketrok panto. Sabab sieun ngaganggu. Jadi ukur narungguan di jero mobilna.

Pas nempo aya Udin rék kaluar naék sapédahna bari mawa kantong balanjaan. Qin Gang jeung Auxé buburu kaluar. Nempo aya Qin Gang, Udin ngarandeg. Qin Gang nyampeurkeun.

"Pa ieu kartu anu di maksud ku kuring tadi peuting. Di jerona aya 1,2 milyar pin 212121. Gunakeun keur balanja di palélangan, ulah asa-asa"

Udin narima kartu bari ngarérét ka Auxé. Ngarasa dirérét ku Udin, Auxé buburu manggut bari imut.

Qin Gang Nyarita deui,

"Pa, sakali deui tulungan kuring. Kuring teu masalah sanajan kudu pondok umur, tapi anak-anak kuring ulah"

Saprak nasib kulawargana goréng jeung perusahaanna rugi sababaraha kali. Qin Gang mémang loba fikiran, kondisi awakna beuki teu séhat. Padahal umurna can kolot-kolot teuing, tapi geus katémbong ripuh. Matak keur dirina sorangan mah ukur bisa pasrah.

Nempo bapana nyarita kitu, cimata Auxé murubut kaluar tuluy nyekelan leungeun bapana bari nyarita ka Udin,

"Muhun Pa Udin, salametkeun kulawargi abdi"

Udin unggeuk,

"Kuring rék nyoba, tapi sakali deui ku kuring ditegeskeun. Kuring ukur nyaréatan. Anu nangtukeun tetep pangéran. Ulah putus-putus ngadu'a dina sagala kasempetan"

Qin Gang jeung Auxé unggeuk.

Udin reugreug nempona, saterusna Udin nyarita deui,

"Kuring rék balanja sayuran heula ka pasar, lamun geus meunang barangna tangtu kuring bakal buburu ngabéjaan"

"Hatur nuhun pa Udin" ceuk Qin Gang bari ngajak Auxé asup kana mobilna.

Balik ti pasar Udin ditanya ku Mardi,

"Din, tadi méméh anjeun ka pasar, bapa nempo anjeun ngobrol jeung Qin Gang di sisi jalan. Aya naon?

Mardi nanya kitu kulantaran ngarasa hariwang bisi aya masalah gara-gara bantuan ti Udin. Sabab lamun Qin Gang ngarasa dibohongan, balukarna lain ukur geulang giok anu bakal dipénta deui, tapi kulawargana ogé tangtu bakal aya dina masalah gedé.

Udin gogodeg,

"Teu aya nanaon pa, anjeunna mung wiat artos kanggé balanja barang di palélangan BCC"

Mardi panasaran,

"Nitip sabaraha? Jeung hayang dipangmeulikeun naon?"

"Samilyar langkung" témbal Udin.

Panon Mardi langsung molotot teu percaya bari nyekelan dadana sabab reuwas.

"Din, ulah gagabah narima duit gedé. Kumaha lamun anjeun salah meuli barang terus Qin Gang teu panuju. Bisa cilaka. Balikeun deui!"

"Abdi ogé ngartos pa, moal sagawayah dina ngagunakeun artosna. Teras ulah nyarios ka ibu sareng ka Icih masalah artos ieu. Abdi alim kajantenan sapertos anu atos-atos" ceuk Udin ka Mardi, sabab Udin hariwang Mardi loba omong deui kawas basa ngabéjakeun ayana geulang giok.

Mardi unggeuk,

"Enya, bapa moal bébéja ka sasaha"

Mardi ogé keuheul ka Lastri nu geus mimiti maceuh deui kana judi. Awalna ukur pamit ka arisan, tapi akhirna Mardi nyaho yén Lastri judi deui. Ngan can bisa negor heuras lantaran dirina sorangan ogé geus mimiti maceuh deui kana meulian barang antik. Saupama di tegor, tangtu lastri bakal malikeun anu ahirna paséa. Jadi leuwih hadé cicing.

Udin ngaléos ka dapur rék nunda balanjaan sakaligus rék masak. Sedengkeun Mardi ngalamun bari diuk mikiran nasib kulawarga ka hareupna. Sok sanajan Icih digawé, di Imah masih aya tiluan anu nganggur. Dirina jeung Lastri teu bisa nahan hobina dina miceunan duit. Sanajan Udin bisa ngirit, tapi sagala léngkahna geus mimiti ngaliwatan wates, geus wani gaul jeung sababaraha jelema beunghar anu sakuduna dipikasérab. Jelas lain masalah leutik, lambat laun kulawargana pasi bakal aya dina masalah gedé saupama aya salah sahiji kulawarga beunghar anu pada ahirna kasinggung ku Udin.

Saméméh Udin saré, Warni ngirim pesen ka Udin yén lelang bakal diayakeun dina poé isukan. Malah warni rék nyampeur. Jadi Udin kaluar deui ti kamarna pikeun ngabéjaan Mardi anu masih aya di rohangan tamu. Isuk kénéh Udin jeung Mardi geus siap indit ka BCC. Lantaran sapeupeuting loba mikiran masalah duit Qin Gang anu dititipkeun ka Udin, Mardi ampir teu bisa saré. Matak ti subuh kénéh geus diuk di rohangan tamu nungguan Udin.

"Pa, saurna aya barang saé anu badé ditawiskeun dina lélangan lot ahir. Bapa parantos uninga?" ceuk Udin anu karék kaluar ti kamarna.

Mardi unggeuk,

"Enya, bapa ogé ngadéngé. Omat ulah asal dibeuli Din. Barang anu ditampilkeun panutup pasti harga pambukana ogé ratusan juta"

Udin seuri,

"Kumaha jenis barangna, upami saé teras manfaatna ageung. Naon lepatna di galeuh"

Mardi nyarita serieus,

"Barang alus pasti saingana ogé loba. Malah bapa ngadéngé aya paranormal ahli métafisika ti Banten anu ngincer barang éta"

"Saha pa?" Udin panasaran.

"Ki Waja, manéhna ogé bakal datang" témbal Mardi.

Paranormal anu ngarana ki Waja mémang geus kawéntar, mineng asup kana acara TV nasional. Teu anéh lamun beunghar, sabab bayaranna ogé mahal. Loba artis-artis atawa pejabat nagara anu geus ngagunakeun jasa Ki Waja pikeun masang susuk atawa meuli barang pusaka anu boga kakuatan ghoib.

Ngan kaahlian utamana mah dina ramalanna anu akurat. Kungsi ngaramalkeun pasangan artis bakal pipisahan sabulan deui. Kabéh euweuh anu percaya sabab pasangan éta katempona ku masyarakat mah rukun jeung harmonis. Tapi nyatana ramalanna bener. Kungsi ogé ngaramalkeun kacilakaan pesawat jeung sabab musababna, éta ogé bener.

Ti harita ngaran Ki Waja beuki kawéntar. Nyaingan para artis. Tamuna rabul jul-jol timana-mana ngadatangan tempat praktékna, aya anu mémang butuh ditulungan. Aya ogé anu ngahaja datang ukur hayang panggih wungkul. Ménta tanda tanganna atawa ménta difoto babarengan.

Udin kerung, lamun Ki Waja jauh-jauh daék datang ka Bandung lantaran barang éta. Pasti barangna mémang hade. Udin jadi beuki panasaran. Barang naon? Naon kahébatanna?

Sabot Udin mikiran barang anu ngajieun panasaran dina haténa. HP dina saku Udin disada, pas ditempo layarna nyatana ti Warni.

"Kang, abdi parantos parkir dipayuneun bumi salira. Hayu urang sasarengan ka BCC"

Warni ngahaja ngajemput sabab sok sieun Udin teu indit. Jeung sok sieun aya masalah deui. Jadi kudu terus dibarengan. Di sisi jalan mémang geus nyampak Bentley beureum geus nungguan. Jadi Udin jeung Mardi buburu kaluar ti imah.

Warni keur nangtung nyarandé kana mobilna maké baju anu sarua beureumna jeung warna mobil. Buuk hideung galing muntang sarta kaca mata hideung. Kabeh cocok jeung pakulitanna anu bodas beresih.

Bari ngaleupaskeun kaca panonna Warni nyarita,

"Pa Udin, pa Mardi, abdi ngahaja ngajemput. Mangga lebet"

Kituna teh bari muka panto hareup jeung tukang.

"Néng Warni uninga nami abdi? nuhun" ceuk Mardi seuri bungah bari rengkuh hormat terus asup diuk dina jok tukang. Udin ogé buburu asup kana jok hareup. Sedengkeun Warni asup pandeuri, langsung nyetiran mobil indit ka BCC. Saterusna némbalan pananya Mardi,

"Tangtos uninga pa. Salira pan mertuana pa Udin. Abdi kenal sareng pa Udin tangtos kedah uninga ogé ka salira"

Mardi ngarasa reueus sarta rasa percaya dirina langsung naék. Saha anu nyangka anggota ti kulawarga Nataprawira daék ngajemput sarta mangmukakeun panto mobil keur dirina jeung minantuna.

Nyambung....