Megatkeun duduluran

"Dasar anak kurang ajar!" Ceuk Rukmini bari maledog sirah Mardi ku asbak anu dijieun tina kai mahoni. Mardi teu ngagiwar, asbak keuna kana tarangna, jelas langsung bonconong héjo. Calacah tina asbak ngotoran sirah jeung beungeutna.

"Pa teu sawios-wios?" Ceuk Icih ceurik karunyaeun bari buburu meresihan sirah jeung beungeut Mardi anu pinuh ku calacah.

Mardi ngarérét seuri ka Icih bari gogodeg. Terus ngalieuk ka Rukmini,

"Ma, tos teu aya deui anu kedah dibahas, abdi seja pamit"

"Hayu balik" ceuk Mardi ka Icih jeung ka Udin. Bari ngaléngkah tiheula dituturkeun ku Icih anu masih inghak-inghakan bari nyusutan cimatana. Saterusna Udin nuturkeun satukangeun Icih bari saacana mencrongan beungeut Rukmini jeung anu sejenna hiji-hiji.

Karsidi nyarita ka Rukmini,

"Ma, rék diarantep indit? Lamun ema teu bisa nindak, kahareupna bakal leuwih kurang ajar"

"Maranéhna geus lain kulawarga urang. Paréntahkeun centéng pikeun ngawarah" ceuk Rukmini ka Karsidi.

Harita kénéh Karsidi lumpat kaluar ngagero para badéga Kulawarga Kusumah pikeun nyegat Mardi jeung anak minantuna.

Wawan Kusumah baheula mémang jelema beunghar, boga pangawal loba husus keur ngajaga diri jeung kulawargana. Tapi ayeuna ukur nyésa tiluan anu tugasna ngajaga imah jeung ngurus pakarangan. Anu 3 urang éta ogé wawuh ka Udin. Tapi nyahona Udin ukur kuli tukang ngaduk anu diangkat jadi incu ku dununganna. Matak pantes nyapélékeun jeung wani ngahadang Udin saenggeus narima paréntah.

Lantaran léngkahna di halangan, Udin buburu maju pikeun ngajaga mitoha jeung pamajikanna.

"Saha anu wani maju, ulah nyalahkeun kuring lamun cilaka" ceuk Udin ka 3 badéga anu ngahadang.

"Boga pangabisa naon sia?" Ceuk saurang badéga bari ngagebugkeun balok kai kana sirah Udin.

Saméméh keuna kana sirahna, Udin buburu ngarebut balok terus dikupat-kapitkeun kana suku si badéga sababaraha kali, tuur, bitis, pingping terus-terusan diperekpek digebugan ku balok teu dibéré kasempetan nangkis atawa ngagiwar. Tepi ka ahirna si badéga ngudupruk diuk teu bisa hudang deui. Terus balok kai dibalangkeun jauh ku Udin.

"Bapa sareng Icih lebet heula kana mobil" ceuk Udin bari mencét rémot muka panto mobil. Icih jeung Mardi lalaumpatan kana mobil terus caricing dijero bari lalajo Udin.

Nempo hiji baturna dilumpuhkeun bari teu dibéré kasempetanngalawan. Anu dua jadi asa-asa sarta silih rérét. Lantaran dua badégana ngararengkog kawas anu sieun, Karsidi jeung Dudung kekerot,

"Rempug!" Ceuk Karsidi

Ngadéngé paréntah Karsidi, duanana langsung maju babarengan bari ngaheumbatkeun peureupna séwang-séwangan. Udin muterkeun awakna bari najongkeun sukuna dua kali. Dua pengawal langsung ngajéngkang bari nyarekelan dada terus ohék-ohekan batuk getih.

Icih anu lalajo ti jero mobil reuwas, ngaranggeum leungeun bapana terus ngajerit nempo salakina dirempug tapi ahirna colohok sabab katempo malah lawan anu éléh.

"Ulah hariwang. Di Imah si Udin sok diajar silat tina TV. Jadi moal éléh" ceuk Mardi nenangkeun Icih, padahal Mardi ogé can kungsi nempo Udin latihan silat.

"Masih diajar tapi sapertos anu parantos mahir" ceuk Icih.

Mardi unggeuk,

"Ieu mah can sabaraha, para pangawal Qin Gang malah silatna leuwih alus, tapi tetep teu bisa ngalawan si Udin"

Nempo 3 badégana geus roboh. Rukmini, Isah jeung Unah buburu lumpat ka jero imah ngonci panto terus naroong tina jandéla Imah.

Nyaho euweuh anu wani maju deui, Udin ngaléngkah kana mobil. Tapi tina kaca mobil kaciri Dudung ngajéwang kampak terus lumpat bari ngaheumbatkeun kampakna kana taktak udin. Sabab kaciri tina kaca mobil, Udin teu ngalieuk deui, ukur ngangkat lengeuna nyapit kampak ku dua ramona bari sikuna diasupkeun tarik kana dada Dudung. Dudung ogé langsung ngajéngkang bari utah getih.

Icih anu nempo deukeut ngan kahalangan ku kaca mobil ti Udin ukur bisa calangap bari nahan napas waktu Dudung ngaheumbatkeun kampakna ka Udin. Terus peureum. Tapi paspanonna beunta deui, Udin teu kunanaon malah kampak anu diheumbatkeun tadi geus dicekelan. Sarta katempo Dudung geus nangkarak gegerungan nahan nyeri bari nyekelan dadana.

Tina jandéla, Rukmini nyorowok ka Karsidi,

"Karsidi. Manéh ukur rék lalajo nempo anak manéh disiksa? Podaran si Udin"

Karsidi anu keur colohok ngadéngé indungna nyorowok kawas karék sadar tina ngimpi, tapi teu wani maju sabab sieun. Udin malik lalaunan bari nyekelan kénéh kampak. Mardi anu dijero mobil ogé kaluar terus najongan suku Dudung anu masih ngagolér bari nyusutan getih anu ngaley tina biwirna.

"Hudang siah!"

Nempo anakna anu geus teu walakaya ditajong ku uwana sorangan. Karsidi ambek terus maju nyuntrungkeun dada Mardi,

"Kang! Si Dudung budak kénéh..." can parat ngomong pipina geus ditampiling tarik ku Mardi.

Ningali Mardi ambek bari nampiling adina, padahal sirah Mardi pasti masih lieur tur nyeri akibat dibalédog ku asbak. Ngajieun Icih beuki ceuceub ka kabéh kulawarga kusumah.

Udin melong ka Dudung anu nguniang diuk,

"Manéh teu bisa nanaon, tapi kalakuan jeung sungut manéh leuwih seukeut tibatan kampak ieu"

"Aing teu nanaon, aing masih wani ngalawan sia" ceuk Dudung bari hudang terus leungeunna diheumbatkeun rék nampiling pipi Udin.

Sakilat leungeunna ditéwak ku Udin, leungeun anu kungsi potong ku Murad, ayeuna diparieuskeun deui ku Udin. "Beletrok!" Leungeunna potong deui terus ngaplek. Dudung ngocéak bari nyekelan leungeunna. Terus ngudupruk diuk deui dina taneuh.

Rukmini anu keur noong tina jandéla, nempo leungeun incuna dipotongkeun langsung lumpat kaluar terus nampiling pipi Karsidi,

"Koplok. Leungeun anak sia dipiteskeun kalah ngajedog" Ceuk Rukmini nyarékan Karsidi bari Malik ka Udin terus rék nampiling pipi Udin.

Dampal leungeunna can keuna, tapi bitisna kaburu ditalapung laun ku Udin. Maklum nini-nini ditalapung saeutik ogé awakna langsung ngabangkieung tibeubeut ka gigir. Rukmini ceurik bari nyekelan cangkéngna akibat bujurna titeundeut kana taneuh, rék hudang hésé, ahirna undur-unduran bari ngésod ngajauhan Udin.

Karsidi nyampeurkeun nyekelan leungeun Rukmini, maksudna rék nulungan nangtungkeun indungna, tapi diképéskeun ku Rukmini,

"Tulungan heula anak sia, dasar anak teu guna" Ceuk Rukmini.

Buburu karsidi ngahudangkeun Dudung terus disangkéh dibawa ngajauhan Udin. Dada Icih beuki gegeberan, panonna ti awal teu lésot ti Udin. Rasa reueusna teu bisa disamunikeun deui, pipina ngadadak bareureum. Sabab karék ayeuna nempo salakina némbongkeun kagagahan jeung kakuatanna. Salila ieu anu mineng katempo ku panona, Udin cicingeun, ukur bisa balanja sayuran jeung masak. Jadi lalaunan Icih muka kaca mobil terus leungeuna kaluar nyekelan leungeun Udin.

Udin ngarérét ka 3 badéga. Anu dibabukan sukuna maké balok masih ngagoler. Tapi anu 2 deui geus dariuk bari pating haregung. Udin nyarita ka anu duaan,

"Buka gerbang!" Ceuk Udin.

Dua pengawal buburu nangtung lalumpatan kana gerbang terus dibuka.

Karsidi nyorowok tina teras imah,

"Udin, anjeun geus motongkeun leungeun anak aing. Tungguan pulisi bakal datang pikeun néwak anjeun"

Rukmini ogé nyorowok ka Mardi,

"Mardi! Mimiti poé ieu sia lain anak aing. Anjeun euweuh hak pikeun narima warisan ti aing"

"Teu masalah ma, kuring masih nganggap ema indung kuring. Tapi kuring teu butuh ku harta ema. Hampura kuring ma" ceuk Mardi bari asup kana mobil.

Rukmini nyorowok deui ka Icih,

"Icih! Manéh ogé lain incu aing deui. Manéh dipecat ti Palapa. Si Unah anu bakal neruskeun kerjasama proyék jeung Bima Raya. Maranéh kabéh ulah nincak deui ka imah ieu"

Icih teu némbalan, tapi buburu nutupan kaca mobil.

"Mudah-mudahan Bima Raya teu nyahoeun kana kajadian ieu" ceuk udin seuri sinis bari ngabalangkeun kampak terus asup kana mobil, mobil muter terus ningalkeun villa Kusumah. Saterusna Udin nyarita deui,

"Poé ieu kabéh kulawarga Kusumah geus nembongkeun sifat aslina, idiot. Dulur geus jadi batur"

Dina mobil Icih ngabeberah Mardi,

"Bapa teu kedah hariwang masalah warisan ti Nini. Upami sifat aranjeunna kitu waé. Moal lami deui oge hartana bakal séép"

Tepi ka Imah tiluana teu cumarita nananon deui, tapi dariuk ngaharuleng mikiran kajadian bieu anu teu diduga ti anggalna. Kasarakahan hayang ngawasa villa Bougenville geus mutuskeun hubungan duduluran.

Teu lila panto imah ngulutrak aya anu muka, Lastri karék balik ti villa, langsung diuk di gigireun Mardi bari kerung sabab ningali tarang Mardi anu bonconong. Terus nanya,

"Kuring tadi ditelepon ku si Isah, naha enya kulawarga urang geus dicorét tina hak waris kulawarga Kusumah? Terus si Icih dipecat ti Palapa? Pan si Icih geus loba ngabantu nepi ka meunang kontrak ti Bima Raya. Asa ku ngarareunah maranéhna kari neruskeun"

Udin buburu némbalan,

"Bu, aranjeunna nuju bunuh diri. nyawana gumantung ka Bima Raya, Bima Raya moal bodo, anu majeng munggaran Icih, di tengah jalan gentos jalmi ku Unah anu teu ngartos nanaon. Paling ogé kontrak diputus. Keun sina karaoseun"

Mardi anu sirahna masih karasa lieur nyarita ka Udin,

"Din, daék nganteur bapa ayeuna ka Bougenville? Bapa hayang nempo deui imah. Daripada pusing mikiran kajadian bieu"

Icih colohok,

"Pa, pan nembé kamari tiditu, piraku ayeuna ahoyong kaditu deui. Jabi pan bumina masih dibebenah ku Libo"

Mardi unggeuk,

"Bapa nyaho. Tapi bapa ukur hayang nempo sakeudeung, teu kudu asup. Lamun henteu bapa moal bisa saré"

Udin ngarti kana tekanan méntal anu keur karasa ku Mardi. Mardi pasti ngan ukur hayang ngabangbrangkeun haténa. Jadi Udin nyarita,

"Hayu pa"

Terus Udin ngarérét ka Icih,

"Nyi, hayu milu. Sakalian bisi aya ideu dékorasi ti nyai. Langsung omongkeun ka Libo sina digawéan"

"Mangga upami kitu mah" Témbal Icih.

"Dupi ema bade ngiring?" Ceuk Icih nanya ka Lastri.

"Pan ema karék balik tiditu, ema capé, rék saré" témbal Lastri.

Ahirna Udin, Icih katut Mardi ningalkeun imah deui. Tepi ka villa mobil diparkirkeun diluar, teu diasupkeun ka buruan villa. Udin kerung, sabab gerbang nutup tapi dijero siga anu loba jelema.

"Aya naon nya kang?" Icih nanya ka Udin.

"Akang ogé teu nyaho, nyai waspada. Akang rék asup tiheula bisi aya nanaon" ceuk udin bari lalaunan ngahésékeun panto gerbang.

Nyampak 6 jelema maraké baju hideung keur ngalung-ngalungkeun parabotan milik pagawé dékorasi ka luar villa.

Mardi langsung nyorowok reuwas,

"Éta para pagawéna ema, pasti dititah ku ema"

Ngadéngé yén jelema-jelema anu keur ngalung-ngalungkeun parabot titahan Rukmini. Udin ambek bari ngagedig nyampeurkeun,

"Saha anu ngijinan aranjeun asup kadieu?"

"Aing!" Ceu Dudung kaluar ti jero villa bari leungeun kénca nyekelan linggis, leungeun katuhuna anu tadi diparieuskeun ku Udin mah geus dibungkus pereban kandel bari diaiskeun kana pundukna.

Udin mencrong seukeut ka Dudung anu kaluar ti jero villa.

Dudung muter-muterkeun linggis bari nyarita ka Udin,

"Udin, dasar sia mah runtah, geus di usir ku kulawarga Kusumah hartina geus euweuh hak deui kana villa ieu. Kabéh rohangan geus diberesihan kari anu di kamar, mana kartu-kartu aksés ka kamar. Bikeun ka aing"

"Dasar euweuh kaéra, teu dibéré nginjeum rék ngarebut" ceuk Icih nyorowok ti tukangeun Udin.

Mardi nyarita ka Dudung,

"Dudung, villa ieu dibikeun ti kulawarga Wijaya ka Udin, lain ti Salman ka Nini sia. Can ngarti keneh?"

Dudung kumecrot nyiduh,

"Cuih, teu kitu aturanna. Paméré ti hiji kulawarga pasti ka kulawarga deui. Ayeuna saria lain kulawarga Kusumah. Naon hakna ngaku-ngaku deui"

Mardi ambek, terus ngaléngkah maju, tapi awakna ditahan ku Udin sangkan mundur deui. Dudung ngacungkan linggisna dipaké nunjuk kana beungeut Mardi,

"Sia geus lain uwa aing. Euweuh hak mapatahan"

Udin nanya ka Dudung,

"Dimana Libo?"

Dudung nyakakak,

"Di jero, tapi geus ruksak diteunggeulan ku aing. Anjeun teu tarima?"

Udin ngarénjag,

"Naon? Manéh nyiksa Libo?" Ceuk Udin bari ngaléngkah maju hayan nempo ka jero imah sabab ngarasa hariwang kana kaayaanna. Ngan ku Dudung di halangan.

Libo jelema anu dipercaya ku Salman pikeun ngurus villa. Tangtu kahareupna Libo bakal jadi pagawéna Udin. Matak wajar Udin nanyakeun kaayaan Libo leuwih tiheula. Panggih munggaran ogé Udin geus resep, salian ti Libo satia jeung sopan, nempo Libo Udin asa nempo wa Asép. Tapi Aki-aki Umur 60-an éta ayeuna geus disiksa ku Dudung. Jelas Udin moal ngantep, Udin teu bisa nahan amarahna.

Dudung nyakakak deui,

"Aing tadi ka si Libo ukur ngabéjaan yén dununganna ayeuna aing, lain sia. Tapi si Libo teu tarima bari terus nananyakeun sia. Kapaksa ku aing disiksa"

Udin geus teu bisa nahan amarahna, ngan sakilat peureup Udin geus meupeuh cukang irung Dudung. Linggis lésot tina leungeunna. Dudung teu kaburu ngagiwar. Irung anu masih kénéh ditutupan ku kapas ayeuna bocor deui, sababaraha huntuna ogé maruragan tina sungutna. Dudung mundur sababaraha lengkah bari ngegerungan nutupan beungeutna. Nempona, jelema-jelema anu maraké baju hideung maju ngepung Udin bari kabéh mesat belati tina cangkéngna séwang-séwangan.

Dudung nyarita ka Udin,

"Aing nyaho sia bisa gelut, tapi awak sia lain beusi, masih dijieun tina kulit jeung daging. Serang!" Ceuk Dudung bari langsung nyorowok méré paréntah ka para pagawéna anu geus ngepung Udin.

Mardi jeung Icih anu aya di tukangeun Udin buburu mundur ngajauhan bari silih cekelan. Udin teu gimir, matana ngarérétan kana beungeut satiap jelema anu ngepung. Kanu duaan Udin nyaho, éta badéga anu geus diéléhkeun di Imah Rukmini. Tapi anu séjén Udin kakara nempo. Sigana para security ti Palapa.

Udin meureupkeun dua leungeuna. Teuing maké gerakan naon, awak Udin nyaho-nyaho ngabelesat kaditu kadieu. Gerakanna hampir teu bisa katempo ku panon. Belati pating garepluk maruragan, 6 lalaki ujug-ujug geus ngagalolér Din taneuh bari leungeun kéncana nyarekelan pigeulang leungeun katuhuna anu kabéh geus ngaraplek parotong. beungeutna kabéh teu béda jauh jeung kaayaan Dudung. Irung jeung biwirna garetihan pating calengir nahan nyeri bari huntuna arompong.

Euweuh anu bisa nangkis, euweuh anu bisa ngagiwar. Malah euweuh anu sempet ngalawan sabab teu nyaho iraha datangna peureup Udin, ujug-ujug pigelang leungeun maranéhna potong, belati ogé murag sarta beungeutna karasa kawas diadu jeung tihang.

Udin molotot,

"Anjing jeung 6 anak anjing ayeuna geus narima hadiah anu sarua ti kuring. Masih aya anu wani maju?"

Dudung colohok nempo 6 anak buahna ngagalolér bari kabéh tatuna sarua kawas dirina. Pigeulang leungeun katuhuna potong, irung gétihan, biwir soeh sarta huntu arompong. Dudung nyaho Udin jago gelut, tapi teu nyangka masih bisa ngéléhkeun 6 urang anu kabeh nyarekel belati sakaligus bari Udin sorangan teu kunanaon.

Awak Dudung langsung ngadarégdég sieun. Ngarasa hanjakal nurut kana parentah Rukmini datang ka villa Bougenville pikeun ngosongkeun eusi villa tina parabotan nu geus aya. Rukmini boga niat langsung pindah nyicingan villa saeungeus narima laporan ti Dudung yen villa geus dikosongkeun. Tapi teu nyangka Udin bakal datang.

Nempo para anak buahna Dudung geus dariuk bari gésod mundur sarta euweuh anu wani maju deui. Udin ngarérét ka Dudung anu nangtung bari sukuna ngadarégdég. Terus Udin leumpang ngadeukeutan.

Nempo Udin nyampeurkeun, beungeut Dudung pias,

"Rek naon?" Dudung nanya bari undur-unduran.

Udin ngajéwang kerah baju Dudung,

"Rék nepi ka iraha sia ngaganggu aing jeung kulawarga aing?"

"Ampun Din, Icih, uwa, tulungan kuring" ceuk Dudung bari ngarérét ka Icih jeung ka Mardi.

"Saha manéh? Kuring teu wawuh!" Ceuk Icih

Mardi ogé nyarita bari sorana ngageter nahan ambek jeung kuciwa,

"Sia anu ngomong aing lain uwa sia deui. Rék naon ménta tulung ka aing?"

Bari masih ngaranggeum kerah baju Dudung, dua ramo leungeun kenca Udin neken kana tarang baga Dudung. Terus nyalurkeun énérgi spiritual tina awakna bari ngaharéwos kana ceuli Dudung,

"Mimiti ayeuna, sia lain lalaki"

Nyambung....