Udin nyalametkeun Léni

Lélang geus dimimitian, MC mimiti muka acara,

"Hadirin lélang rék dimimitian, tapi saacanna kuring ngondang tabib Tiandi pikeun nganilai akar bajakah ieu. Ka tabib Tiandi dihaturanan naetk kana panggung"

Tiandi nangtung manggut ka sararéa terus naek sarta nyokot akar bajakah terus ditempoan kalawan taliti pisan. Saenggeus sababaraha menit tiandi nyarita,

"Hadirin, akar ieu sabenerna diala tina tangkal anu umurna geus 350 taun, jadi dumasar kana tetempoan Kuring, ieu akar anu qualitasna paling hadé"

Kabéh peserta lélang colohok. Udin ogé muji dina haténa, sok sanajan anu diucapkeun ku Tiandi béda jeung tetempoan batinna, tapi bédana teu jauh. Udin maké mata batin, sedengkeun Tiandi ukur nyabak bari diilikan.

MC ngomong deui,

"Tabib Tiandi ieu nyaéta ahli dina widang médis tradisional jeung modern. Tabib kawéntar anu geus mampu ngubaran panyakit lumpuh total. Aranjeun kabéh geus ngadéngé penjelasanna ngeunaan akar bajakan ieu. Hatur nuhun tabib" ceuk MC manggut ka tiandi terus nitah tiandi turun deui.

Saenggeus Tiandi turun tina panggung sarta diuk deui, Aya sora kadéngé tukangeunna.

"Tabib Tiandi, lumpuh total can aya ubarna. Kumaha anjeun bisa nyageurkeunna? Kuring teu percaya"

Tiandi ngarérét ka tukang sarta langsung seuri, sabab jelema anu ngomong Bruce. Saurang tabib anu ahli dina ngajieun ubar tradisional ti Ambon, geus kawéntar sa Maluku jeung Indonesia timur séjénna.

"Bruce, anjeun keur naon didieu?

"Kuring datang sabab hayang ngabuktikeun béja, kuring masih can percaya" témbal Bruce.

Tiandi seuri,

"Anjeun bener, ukur béja, jadi teu perlu percaya"

MC geus muka penawaran,

"Harga awal dibuka 50 juta sarta kanaékan 10 juta. Ka anu minat, aranjeun bisa mimiti ngajukeun panawaran!"

"100 juta!" Kadéngé Baréna nawar pangheulana. Baréna nyaho hargana pasti moal kurang ti 300 juta. Jadi langsung ngagebrag ku harga luhur.

"110 juta" ceuk saurang aki-aki.

Baréna ngarérét ka aki-aki, sabab teu nyangka bakal aya anu ngalawan kana panawaranna. Jadi buburu nyorowok deui,

"150 juta!"

"160 juta!" Saurang anu diuk pangtukangna nyorowok.

"250 juta" Ceuk Baréna deui. Ngadéngé kanaékan panawaranna, jelas Baréna katempo hayangeun pisan bisa ngapimilik akar éta. Sabenerna Baréna ngawakilan Firman, jadi teu asa-asa nawar sabab firman anu bakal mayarna.

Sararéa colohok teu nyangka ngadéngé harga anu langsung naék ka angka 250 juta dina kurang ti 3 menit. Sawaréh anu geus nawar mimiti mundur. Anu can nawar ogé jadi murengked teu wajib milu nawar.

"300 juta!" Ceuk Udin.

Can ogé béak kareuwas jelema, geus ngadéngé deui panawaran anu leuwih luhur ti Udin. Jelas kabéh ngarérét ka Udin.

Baréna jeung Firman teu nyangka Udin bakal ngabégal panawaranna. Jadi buburu haténa nyorowok,

"400 juta!" Ceuk Baréna.

Firman geus mimiti hemar-hemir sabab Aya Qin Gang di gigireun Udin. Disangkana Udin dimodalan ku Qin Gang pangna wani nawar luhur. Firman jelas moal mampu saupama kudu ngalawan kabeungharan Qin Gang sabagé jelema nomer dua sa Bandung.

Ngan Baréna teu nyahoeun kana kasieun Firman. Baréna masih nawar,

"450 juta"

"500 juta!" Ceuk Udin deui. Udin teu hariwang sabab dina saku bajuna aya cék samilyar anu ti Warni téa. Jadi Udin teu sieun éléh. Tibatan kabikeun deui ka Lastri.

Firman ambek, terus ngaharéwos ka Baréna,

"Si runtah sigana ngahaja sangkan panyakit kuring teu bisa cageur. Tapi kuring moal sanggup ngalawan duit Qin Gang"

"Bener. Lamun teu boga niat ngahalangan, keur naon manéhna meuli akar bajakah. Meni geus ateul leungeun kuring hayang modaran. Mun teu dihalangan ku Boyo, di Brilliant Club, si runtah kudu geus modar" ceuk Baréna milu ambek. Saterusna Baréna nyorowok deui,

"600 juta"

"800 juta" Témbal Udin. Bari ngarérét ka Firman terus seuri.

Sabab ngarasa dikadék ku Udin. Firman nyorowok tanpa nungguan Baréna deui,

"900 juta!"

Baréna ngarénjag, terus ngaharéwosn ka Firman,

"Panawaran anjeun teu asup akal. Mémangna anjeun boga duit sakitu?"

Firman gogodeg,

"Teu boga. Tapi kuring hayang ngabangrutkeun jelema anu geus ngabékingan si Udin ku cara terus naékeun harga"

"Samilyar" ceuk Udin.

Firman muncereng ka Udin,

"Udin naon maksud anjeun?" Pokna bari nangtung, ambekna geus teu kabendung deui.

"Kuring butuh pisan akar éta keur ngaganjel panto dapur kuring. Pasti kuring moal mundur tibatan dipaké ngubaran bobogaan anjeun" témbal Udin bari seuri sinis.

"Koplok! Kéna-kéna dibékingan ku jelema beunghar. Dasar tukang tipu" ceuk Firman ambek.

Firman ngarérét ka MC,

"MC! Anjeun kuduna ngusir jelema éta. Sabab anu dipaké lain duitna, teu adil"

Tiandi langsung nangtung,

"Panitia pelélangan teu boga hak nanya asal usul duit, anu penting bisa mayar. Kusabab anjeun geus nuduh pa Udin teu adil. Kuring sadia mangmayarkeun"

"Kuring ogé, siap mangmayarkeun" ceuk Qin Gang bari ngacungkeun leungeunna.

Kabéh peserta lélang jelas colohok, saha Udin? Qin Gang jeung Tiandi nepi ka sadia ngabékingan dana.

Sabab pada melong, Udin ogé ngarasa teu ngeunah haté. Jadi Udin nyarita,

"Ukur samilyar, kuring masih mampu mayar maké duit kuring sorangan. Aya cék samilyar dina saku kuring anu ampir kapiceun"

Firman nyakakak,

"Ulah nganggap kabéh jelema bodo, timana anjeun boga duit samilyar? Dasar tukang tipu?"

Udin ngaluarkeun cék lecek samilyar, terus ditémbongkeun ka sararéa.

"Pariksa cék ieu, bisi disangka palsu" pokna bari ngabébérkeun cék anu geus kusut.

Kabéh jelema euweuh anu teu kerung, sabab duit samilyar ukur mangrupa cék lecek bari geus kusut. Saha anu percaya.

Saurang panitia maju pikeun mariksa cék. Saenggeus ditempoan terus nyarita,

"Cék ieu nilaina samilyar, asli!"

Kabéh gogodeg, ngarasa milu manghariwangkeun. Cék samilyar ukur disakuan. Kumaha saupama cék éta leungit atawa kaseuseuh? Kumaha saupama murag kana closét sawaktu modol? Cék samilyar éta teuing geus sabaraha lila aya dina sakuna nepikeun ka robah warna jeung bentukna.

Firman diuk leuleus, dugaana salah. Sabab nyatana Udin teu dibékingan ku sasaha. Ngan timana jeung ti iraha Udin boga duit sakitu?

"Jadi kumaha akarna, geus bisa jadi milik kuring?" Ceuk Udin nanya ka panitia.

MC unggeuk, terus nyarita ka sararéa maksudna lélang rék ditutup,

"Kulantaran geus euweuh deui anu nawar, jadi..."

Ngan can parat ngomongna Firman nyorowok,

"Ké heula, Kuring masih rék nawar!"

Kabéh ngarérét bingung ka Firman. Harga dibuka 50 juta, saterusna harga geus naék jadi samilyar. Tapi Firman masih wani nawar kénéh.

"Firman, ulah! Harga samilyar teu asup akal, anjeun ulah gagabah" ceuk Baréna ngingetan.

"Lamun teu kabeuli ku kuring, kumaha nasib bobogaan kuring?" Ceuk Firman ka Baréna.

Harita saurang lalaki botak nyampeurkeun rusuh ka Baréna, terus ngaharéwos,

"Pa Baréna, tadi abdi ngantosan heula hasil panalitian di laboratorium, hapunten telat sumping ka dieu" Ceuk Jelema botak anu nyatana kepala apotéker Triman.

"Jadi miturut anjeun kumaha? Perlu teu akar bajakah ieu dibeuli? Hargana ayeuna samilyar" Baréna nanya.

"Hah! Samilyar?" Kepala apotéker colohok. Terus gogodeg,

"Upami hargana sakitu ulah pa. Akar bajakah Papua mémang langki, nanging hasiatna teu bénten sareng bajakah kalimantan. Janten tiasa digentos ku bajakah kalimantan anu yuswana 100 taun. Kaleresan bajakan Kalimantan mah seueur. Pasti salah sawios stan di dieu ogé ngical"

"Yakin bajakah Kalimantan bisa nyageurkeun panyakit Firman?" Baréna nanya deui panasaran.

"Perkawis éta abdi ogé teu patos yakin margi teu acan diujicobakeun. Nanging dibanding bajakah Papua anu 300 taun ieu. Daripada salira miceunan artos samilyar, langkung saé artosna digaleuhkeun kana bajakah Kalimantan. Asal panyulinganna leres, khasiatna tangtos sabanding" témbal si botak.

MC nanya ka Firman,

"Kumaha pa Firman? Anjeun rék ngajukeun panawaran sabaraha?"

"Teu jadi! Ukur jelema idiot anu wani meuli samilyar" témbal Firman bari nangtung terus gura-giru kaluar ti paméran dituturkeun ku Baréna jeung si botak.

Kontan Firman disurakan ku peserta séjén.

"Ngomong wé teu boga duitna woy!"

Tapi Firman teu maliré.

"Oké. Pemenang lélang bapa Udin, kajual samilyar!" Ceuk MC bari nutup acara.

Saenggeus mikeun cékna jeung narima barangna. Udin nangtung terus pamitan ka Tiandi rék balik.

Tiandi ogé nangtung,

"Hayu dianteur deui ku kuring"

"Teu kudu, kuring bisa balik sorangan. Didieu anjeun loba wahuh jeung tabib-tabib séjén. Leuwih hadé anjeun ngobrol heula" ceuk Udin nolak dianteur.

Qin Gang ogé hayang nganteur, tapi sarua ditolak ku Udin.

Saméméh indit, Udin ngarérét heula ka Ichiro anu melong waé ka Tiandi. Jadi Udin ngaharéwos,

"Tiandi. Mimiti ti ayeuna. Saha waé anu maksa ménta ubar ku cara kekerasan. Ulah ngalawan, bikeun ubar anu tadi ti kuring"

"Siap guru" ceuk Tiandi.

Nempo Udin rék balik. Auxé anu titadi nungguan lélang bubar. Buburu kaluar ti stanna ningalkeun Steven langsung nyampeurkeun ka Udin bari tungkul éra.

"Pa Udin. Badé dijajapkeun ku abdi?"

Udin ngarérét ka Auxe, tapi kaciri Auxe siga anu keur ngalamun bingung kawas aya anu hayang ditepikeun ka Udin tapi éra jeung asa-asa. Sabab Udin hayang nyaho, jadi Udin unggeuk,

"Hayu"

Ahirna duanana leumpang bareng kaluar. Sabab panasaran, dina mobil Udin nanya ka Auxé anu nyupiran,

"Auxe, jujur ka kuring. Anjeun keur boga masalah?"

"Pa Udin. Salira tiasa nebak abdi nuju aya masalah?" Auxé nanya, beungeutna bareureum éra.

"Tanpa anjeun nyarita kuring bisa nempo tina beungeut anjeun. Tara biasana. Sok bébéja ka kuring, ulah asa-asa" ceuk Udin seuri.

Auxé beuki éra. Sanajan ceuk Batur dirina tomboy, lincah jeung centil sarta jago béla diri. Tapi teuing kumaha tiap paadu hareupan jeung Udin mah dirina pasti ngarasa lemah jeung éra. Ahirna Auxé unggeuk,

"Pa. Abdi badé nyuhunkeun bantosan. tiasa?"

"Bantuan naon?" Udin kerung.

Auxé ngajelaskeun,

"Abdi kagungan sobat istri di sakolaan. Sateuacanna anjeuna kagungan sifat terbuka, lincah, teu isinan, aktif tur pinter. Nanging ayeuna sifatna janten robih sapertos anu dihipnotis ku kabogohna. Upami kabogohna nyarios, dipiwarang naon waé ogé ngagugu. Kantos aranjeunna paséa teras sobat abdi dipiwarang luncat ti lantéi-4 ku kabogohna. Upami teu énggal disalametkeun ku anu sanes, tangtos moal katulungan. Ayeuna téh tara lebet ka kelas, sadidinten ngonci diri di kamar asrama, niatna hoyong maéhan manéh wae"

"Terus?" Ceuk Udin beuki panasaran.

"Ayeuna sifatna langkung parah, sapertos anu parantos dicuci otak. Teu émut ka abdi, teu émut ka dirina nyalira. Dina émutanna mung nami kabogohna sareng nyarios waé hoyong bunuh diri. Abdi hariwang" ceuk Auxé deui.

"Anjeun yakin kabogohna anu ngalakukeunna?" Udin nanya bari kerung.

"Yakin pa, margi sanés saurang dua urang. Tiap istri anu kantos bobogohan sareng anjeunna pasti sifatna janten robih sapertos kitu. Sobat abdi duka korban anu kasabaraha. Pamegetna sapertos kagungan métode kanggé nalukkeun istri. Nanging sanés pélét. Tapi ku cara masihan sugésti psikologis" ceuk Auxé ngajelaskeun.

"Jahat!" Udin kekerot.

"Muhun pa. Nanging teu aya bukti nyata, matak guru ogé teu wantun nindak" ceuk Auxé deui.

"Lalaki kitu ukur sampah masyarakat, lahir ti saurang Awéwé tapi ngaruksak Awéwé" ceuk Udin.

Auxé neruskeun deui,

"Taun kamari aya anu dugi ka ngandung, teras luncat ti lantéi-4 sakolaan kumargi isin. Teu acan lami ogé aya siswi anu ngaraos dirina kotor waé, sadinten ulah uih belasan kali ka kamar mandi ngaguyur dirina ku cai, sanaos tengah wengi. 4 urang dokter psikiater nyebatkeun anjeunna déprési anu ngajantenkeun jiwana ka ganggu. Ahirna ku fihak sakolaan diuihkeun ka kulawargana. Anéhna téh, sadaya korbanna ti luar Bandung anu mémang linggihna di asrama"

Udin beuki panasaran,

"Anu lalakina di asrama ogé?"

"Muhun pa, anu pameget di asrama pameget, anu istri di asrama istri. Nanging sadayana aya di lingkungan sakola" témbal Auxé.

"Lamun kitu, ayeuna anteurkeun kuring ka sakolaan anjeun. Kuring hayang nempo sobat anjeun" ceuk Udin.

Auxé ceurik bungah,

"Nuhun pa. Abdi percanten pa Udin tiasa nyalametkeun sobat abdi. Malih upami tiasa mah anu pamegetna warah supados teu aya korban deui"

"Lamun panyababna mémang hipnotis, kuring ogé can yakin bisa. Tapi bisa dicoba" ceuk Udin.

"Kumaha upami wengi pa, ulah ayeuna. Margi upami ayeuna mah, abdi sieun aya guru atanapi penjaga anu ningal abdi ngalebetkeun pameget ti luar ka sakolaan" ceuk Auxe.

"Teu masalah" Udin unggeuk.

"Pamegetna mémang bajingan pa. Nanging anjeunna pinter, kasép tur beunghar. Janten dipikaresep ku istri. Mung nya kitu, tiap aya istri anu keresa janten kabogohna, hubunganna pasti tara lami, anu istri pasti cilaka saatosna dilecehkeun ku anjeunna" ceuk Auxe nambahkeun.

"Hipnotis kudu diwarah ku hipnotis deui, Sina nyaho kumaha rasana dihipnotis" témbal Udin.

Udin ahirna jangjian jeung Auxe. Peuting bakal panggih di sakolaanna. Saterusna Udin ménta dianteurkeun balik ka imah rék nunda akar bajakah.

Nepi ka imah Udin diuk di kamarna terus mokuskeun p

Fikiranna bari peureum pikeun ngaguar sarta neuleuman métode hipnotis tina kitab Ghoib 9 Élmu Karuhun anu aya dina dirina. Saenggeus bener-bener ngarti Udin beunta bari ngarénghap panjang.

Sabab hariwang kana kasalametan Tiandi. Udin ogé teu poho nelepon Isak pikeun ngirim jelema, husus keur ngunguntit Ichiro. Ti Bahar, Udin ogé ménta jelema pikeun ngajaga klinik Tiandi.

Isak langsung ngirim dua tim ka bandara jeung ka paméran, ngajaga Ichiro sangkan teu bisa kabur ka Jepang. Ningali galagat Ichiro, Udin yakin Ichiro bakal ngahalalkeun sagala cara sangkan bisa ngarebut ubar ti Tiandi pikeun ditaliti sarta di produksi massal di pabrikna. Jadi Udin ngahaja nyiapkeun porog. Ichiro mah teu sadar Udin geus nyiapkeun sagalana sangkan Ichiro teu bisa kabur ti Bandung.

Sabab katingalina paréntah Udin teu biasa. Bahar ogé nelepon Emus anu aya di Cicaléngka sangkan nyiapkeun tempat bisi sawaktu-waktu aya kiriman sandera ngadadak.

Peutingna sasuai jangji, Udin geus tepi ka sakolaan Auxé. Auxé ogé geus nyampak nungguan di gerbang sakolaanna bari dina kaayaan hariwang, sieun jeung geumpeur. Ningali Udin datang, buburu Auxé nyampeurkeun. Ningali Auxé siga anu sieun Udin ogé buburu muka kaca mobilna.

"Pa. Énggal lebet. Sobat abdi ayeuna badé maéhan manéh. Teu aya anu tiasa ngahalangan" ceuk Auxé hariweusweus.

Udin buburu markirkeun mobilna di luareun sakola terus kaluar,

"Kumaha situasina?"

Leungeun Udin dicekelan ku Auxé terus ditungtun ngagedig asup ka lingkungan sakolaan,

"Uih ngajajapkeun pa Udin. Abdi langsung kadieu badé nepangan sobat abdi. Nanging anjeunna nuju paduduaan sareng pamegetna, janten abdi mung tiasa ngawaskeun ti katebihan. Teu lami aranjeuna paraséa deui, sobat abdi dicabok teras dikantunkeun. Sobat abdi lumpat ka sisi talaga pengkereun sakola badé ngunclungkeun manéh. Janten ayeuna masih ngajentul di darmaga. Teu aya anu wantun nyaketan da bilih nékad luncat"

Sabab tempatna rada jauh jeung teu asup mobil. Auxé lumpat, kapaksa Udin ogé kudu lumpat nuturkeun.

Sakolaan Auxé mémang sakolaan top anu aya di Batujajar, Bandung barat. Pakarangan tukangeun sakola lega sarta nyambung ka Saguling.

Nepi ka lokasi anu dituju, Auxé langsung dipapagkeun ku saurang siswi séjén anu keur niténan.

"Auxe! Tingali tuh si Léni geus nepi ka tungtung darmaga" ceuk si siswi bari nunjuk kana kalangkang saurang siswi anu geus aya di tungtung darmaga panjang.

Karék ogé Udin ngarérét nempo kana panunjuk, siswi anu ditunjuk geus ngaragragkeun manéh kana cai talaga. Auxé jeung baturna anu ngawaskeun ngajarerit. Udin langsung lumpat ka darmaga sarta luncat kana cai nyalametkeun Léni anu geus titeuleum. Udin nyilem néwak awak Léni di jero cai.

Ngarasa awakna aya anu nyekelan dibawa ngumbul deui ka luhur, Léni abrug-abrugan hayang dilésotkeun. Pas sirahna kaluar tina jero cai Léni jejeritan,

"Ulah disalametkeun, kuring hayang paéh, kuring geus teu parawan, kuring kotor, Wuki hampura, kuring bogoh ka anjeun"

Léni dibawa ngojay kasisi ku Udin sanajan terus abrug-abrugan sarta cocorowokan ngucapkeun kalimah anu sarua sarta terus diulang-ulang.

"Ulah disalametkeun, kuring hayang paéh, kuring geus teu parawan, kuring kotor, Wuki hampura, kuring bogoh ka anjeun"

Udin teu nyerah. Nepi ka sisi, léni langsung digolérkeun dina jukut.

"Anjeun teu karunya ka kolot?"

Tapi jawaban Léni tetep sarua,

"Ulah disalametkeun, kuring hayang paéh, kuring geus teu parawan, kuring kotor, Wuki hampura, kuring bogoh ka anjeun"

Udin beuki yakin, éta kalimah sugésti anu geus ditanemkeun dina otak Léni ku Wuki. Jelas mangrupakeun hipnotis. Sabab kalimahna terus diulang-ulang bari teu malire deui nanaon.

"Anjeun hirup lain ngan ukur keur sorangan, tapi keur kolot anjeun. Diurus ti leuleutik nepi ka gedé, disakolakeun sangkan pinter, ayeuna rék maéhan manéh karna cinta. Ngérakeun!" Ceuk Udin.

Auxe jeungbaturna anu geus nyampeurkeun ogé milu ngomong,

"Léni anjeun bodo, teu pantes anjeun paéh gara-gara si Wuki"

"Ulah disalametkeun, kuring hayang paéh, kuring geus teu parawan, kuring kotor, Wuki hampura, kuring bogoh ka anjeun" ceuk Léni keukeuh.

Nyambung...