Élsa ngungkapkeun eusi haténa

Élsa dianteurkeun ka hotél Padma tempat cicingna ayeuna saprak kajadian di Papandayan. Miturut Élsa, salian kaamananna alus, Padma ogé milik kulawarga Subrata, harepan Élsa cicing didinya saha anu nyaho bisa panggih jeung boss Bima Raya, incuna Agus Subrata.

Saenggeus turun, Élsa nganuhunkeun ka Udin jeung ka Icih. Tapi panonna teu bisa bohong, aya rasa timburu nempo kari Icih jeung Udin duaan dina mobil. Loba kalimah anu hayang diucapkeun ka Udin. Hayang nganuhunkeun sabab geus 2 kali nyalametkeun nyawana. Hayang blak-blakan yén dirina bogoh. Jeung sajabana. Tapi Icih aya didinya, mustahil rasa éta dikedalkeun.

Nempo Elsa siga anu ngalamun sedih, Icih turun terus ngarangkul,

"Ulah poho telepon kang Udin lamun butuh dibaturan. Ulah ngantep diri dina bahaya"

Élsa unggeuk terus malik, leumpang lalaunan asup ka hotél siga anu haroréam. Icih ogé sarua, buburu asup kana mobil terus nitah Udin majukeun mobilna.

Udin ngetik chat ka Isak,

"Mang, kirim pesen ka kulawarga Wisésa, lamun aya anu coba-coba rék nyilakakeun Elsa deui, kudu urusan heula jeung kuring, Udin Subrata"

Tepi ka imah, Udin buburu mandi sarta ganti baju sabab geus kahujanan. Réngsé ganti baju, Udin nyampeurkeun ka Mardi bari mikeun duit 3 juta ti Érwin.

Mardi nyakakak bungah,

"3 juta ieu kauntungan bapa anu munggaran tina ngajual barang. Duitna rék dimodalkeun deui kabéh. Ti ayeuna kahareup, bapa anu rék néangan duit keur nyukupan pangubutuh kulawarga"

Udin teu ngoméntaran nanaon, ukur bisa gogodeg. Sabab watir ka Érwin, lamun terus dimanfaatkeun ku Mardi lambat laun usahana bakal tutup. Tapi lamun dijelaskeun ka Mardi ogé moal pihadéeun. Sanajan Érwin tukang tipu, tapi sifat kamanusaana teu goréng-goréng teuing.

Hiji-hijina anu bisa dilakukeun ku Udin nyingsieunan Mardi,

"Pa, Érwin tukang tipu. Teu mustahil ayeuna nuju aya dina pangawasan pulisi. Upami teras-terasan bapa gaul sareng anjeunna. Lambat laun bapa ogé bakal kacacandak"

Mardi gogodeg,

"Ulah mapatahan bapa, anjeun ogé sarua, ngadukun bari teu dumasar kana kaahlian. Pan éta oge nipu. Naon anu dilakukeun ku bapa murni jual beuli jeung si Érwin, lamun si Érwin nipu batur, nya résikona sorangan. Euweuh pakaitna jeun bapa"

Udin teu bisa kumaha, ahirna balik deui ka kamar rék saré. Icih ogé nyatana karék réngsé mandi sabab buukna masih dibeulit ku anduk sarta keur ngadapang dina ranjang bari geus maké lingerie ipis, jeroana sanajan samar katempo kabéh. Udin kerung sabab tara biasana Icih dangdan kawas kitu.

Sabab Icih ngagolér nangkuban, Udin ngajanteng merhatikeun. Taktak sarta tonggongna anu kabuka nembongkeun pakulitanna anu beresih bodas. Cangkéng leutik tapi bujurna bahenol jeung pepel. Tikoro Udin ngadadak asa garing nepi ka kudu neureuyan ciduh sababaraha kali.

Lingerie Ipis anu ngan seret pingping teu mampu nutupan kamulusan awak Icih, pingping sarta bitis anu beresih euweuh cacad katembong sampurna di mata Udin.

Waktu Icih malikeun awakna nangkarak, rada reuwas sabab Udin nyampak keur ngajanteng merhatikeun dirina bari teu kiceup-kiceup. Ngadadak beungeut Icih ngahéab panas lantaran éra.

"Ningal naon kang sapertos anu nembéan, sanés parantos biasa ningal abdi? Naha ayeuna katawisna bénten, naha aya anu robih dina diri abdi?" Pokna nanya basa-basi. Padahal haténa mah atoh diteuteup ku Udin.

Udin némbalan,

"Nyai teu biasa maké lingerie saméméh saré, jelas béda ti sasari"

Icih seuri, ngan seurina oge lain seuri biasa, tapi seuri ngagoda. Poe ieu Icih memang beuki resep jeung reueus ka udin. Saacanna Icih nempo Udin ukur lalaki biasa anu rajin tur bisa gelut. Tapi teu nyangka aya kapinteran jeung kakuatan séjén anu disumputkeunna. Kharisma Udin beuki naék dimata Icih. Komo kasaksian Udin geus jadi pahlawan, nyalametkeun nyawa sobat dalitna.

Icih nyangigir terus nepak kasur gigireunna,

"Kang calik didieu, jelaskeun ka abdi kunaon salira janten hébat. Tiasa ngéléhkeun 2 buronan anu dipikasieun ku sasaha?"

"Sun heula akang, ké dijelaskeun" ceuk udin bari seuri ngagoda terus diuk dina sisi ranjang.

"Ngimpi" ceuk Icih ngadilak, bari pura-pura nangkuban deui ngarepkeun Udin terus ngagoda dirina. Atawa langsung ngarontok ngagaléntoran dirina ti tukang.

Tapi teu disangka Udin malah cengkat, terus leumpang ka juru kamar rumpa-rampa kana sisi lomari rék nyokot samak, tapi geus euweuh. Terus muka lomari, simbut anu biasa dipaké saré ogé euweuh. Jadi Udin nanya,

"Nyi, kamana samak jeung simbut akang?"

Icih diuk bari muka anduk anu nutupan buuk baseuhna,

"Di seuseuh ku abdi, margi tos barau"

Udin ngajanteng kawas anu bingung, terus nyarita,

"Akang moal bisa saré lamun teu ditilaman, sieun rématik katiisan. Kapaksa akang kudu saré dina korsi"

"Dasar!" Ceuk Icih bari buburu nyokot simbut milikna terus dialungkeun ka Udin.

"Tah anggé simbut abdi kanggé tilam"

Terus Icih turun tina ranjang muka lomarina sorangan nyokot jakét. Jaket ogé dialungkeun deui ka Udin,

"Anggé jakét abdi supados teu tiris"

Saterusna Icih ngabeubeutkeun awakna nangkarak dina ranjang bari kukulutus,

"Kawas sanés pameget" pokna, maksudna mah kunaon Udin teu ngarti kana isyaratna.

Tapi Udin salah tarima, simbut diamparkeun bari némbalan,

"Har! Lalaki mana waé ogé ari kudu saré dina ubin sapeupeuting bari teu ditilaman mah pasti gering atuh nyi"

"Seueur alesan, peureum!" Ceuk Icih bari nangkeup guguling.

Udin buburu ngagolér ngaréngkol nyinghareup kana ranjang Icih bari ngaharudumkeun jaket Icih kana awakna. Terus nyarita,

"Nyi, kunaon bageur pisan ka akang. Nyai moal tiris saré ukur maké baju ipis bari teu simbut?"

"Gandéng! Peureumkeun socana ulah nyarios waé" ceuk Icih beuki keuheul bari bari nyokot bantalna anu disaréan dipaké nutupan beungeutna sorangan.

Teu lila Icih nyingkahkeun bantal tina beungeutna terus nyangigir malik ka Udin anu geus ngaréngkol di handap bari peureum,

"Kang" ceuk Icih sorana lalaunan.

"Naon nyi?" Tembal Udin tapi panona tetep peureum.

"Abdi tos mendak tempat kanggé ngantor satauneun kumplit sareng méja kerja, korsi kalih rak arsip. Parantos dilunasan online. Énjing ku abdi badé dibérésan deui sakantenan masang banner sareng spanduk teras badé langsung milarian orderan. Wéyahna akang di bumi ngaréncangan bapa bilih angkat deui méséran barang antik" ceuk Icih.

"Akang kudu milu ka nyai. Nyai bisa langsung néangan orderan. Masalah bébérés kantor, masang banner jeung sepanduk, akang anu migawé" Témbal Udin.

"Teu kedah kang, anu kagungan tempat badé ngabatos sakantenan masihkeun koncina ka abdi. Salajengna abdi badé teras nguriling milari orderan ka perumahan sareng proyék-proyék bangunan. Akang mah didamel di bumi wéh sapertos biasa bari ngaréncangan bapa" ceuk Icih. Terus nguniang deui hudang nyokot daster tina lomari langsung dipaké, saterusna ngagolér deui saré.

Isukna Icih geus indit. Udin ogé geus ngaboséh sapédahna ka pasar. Sabab Icih geus mimiti sibuk, Udin balanja rada loba jeung ngahaja meuli daging, endog, lauk jeung sayuran aralus sarta bubuahan seger. Sanajan duit balanja ti Lastri kurang, ngahaja ditambahan ku duitna sorangan. Sabab Icih kudu séhat, ulah nepikeun ka gering lantaran capé teuing digawé.

Kaluar ti pasar nyampak deukeut sapédahna anu diparkir geus aya Élsa nungguan,

"Kang Udin!" Ceuk Élsa atoh kawas anu anyar panggih.

Udin kerung, sabab teu katempo Élsa mawa balanjaan. Papakéanna ogé baju kantoran sarta maké selop hak jangkung,

"Naha aya didieu? Mémangna teu digawe?"

Élsa ngadadak geumpeur, sabab bingung rék némbalan naon.

Ningali Elsa siga anu geumpeur, Udin beuki bingung,

"Aya naon? Anjeun boga masalah deui?"

Élsa malah beuki katempo rampang reumpeung serba salah. Élsa geus lila nungguan Udin kaluar ti imah, saterusna nuturkeun sapédah Udin kana mobilna, terus nungguan didinya ampir sajam. Ayeuna Udin nanya, naon anu kudu dijelaskeun?

Ahirna Élsa nyarita sanajan sorana rada ngageter,

"Abdi badé nganuhunkeun ka akang. Margi mobil parantos saé deui. Malih langsung dijajapkeun ka Padma ku béngkélna subuh kénéh. Sareng abdi ogé badé nganuhunkeun wiréhna salira parantos nyalametkeun nyawa abdi"

"Sugan téh aya naon" ceuk Udin reugreug, ahirna seuri.

"Kawajiban kuring kudu nulungan, sabab kajadianna hareupeun kuring, komo deui anjeun sobatna Icih. Piraku rék diantep"

"Nanging salira nyalametkeun nyawa abdi dua kali sareng di Papandayan" ceuk Elsa deui.

Udin colohok bingung, naha Élsa bet nyaho?

"Di Papandayan? Ari kitu kunaon di Papandayan? Akang teu rumasa nulungan anjeun di Papandayan" ceuk Udin pura-pura.

Nyaho Udin keur pura-pura Elsa surti. Pasti Udin masih rék nyumputkeun jati dirina. Tapi Naha? Kuduna Udin balaka teu kudu pura-pura deui. Udin nunda balanjaana kana karanjang sapédah, sawaréh sicantélkeun dina setang, terus leumpang lalaunan bari nungtun sapédahna dibarengan ku Elsa,

"Wengi harita abdi ditraktir tuang di Papandayan ku Dudung. Nuju tuang abdi digoda ku pameget, teras pameget éta ditusuk ku Dudung mastakana nganggé garpuh. Abdi teu nyangki masalahna bakal manjang. Uihna abdi badé diculik malah pingping abdi ditubles ku péso margi abdi ngalawan. Teras aya saurang pamuda anu nulungan abdi" ceuk Élsa ngajelaskeun kajadian di Papandayan bari ditungtungan ku ngarénghap panjang, sabab masih kabayang kénéh basa leungeun Udin nyasar urat dina pingpingna sarta leungeun Udin anu geus deukeut pisan kana bobogaanna sawaktu meulitkeun beubeur dina puhu pingpingna.

Sanajan Harita Udin teu niat jahat, tapi hiji awéwé muka calana dihareupeun lalaki bari ngan ukur duaan. Jelas Élsa baper.

Udin pura-pura ngarénjag,

"Terus kumaha si Dudung? Mémangna teu nulungan?"

"Ningal abdi ditéwak, Dudung mah malah kabur kang" ceuk Élsa bari kekerot ambek.

Udin seuri,

"Anjeun salah, éta lain kuring. Pasti aya lalaki séjén anu mirip. Kuring karék nulungan anjeun sakali, kamari hungkul"

Élsa ngaluarkeun batu bodas tina tasna anu geus dipulangkeun deui ku Érwin ka dirina,

"Ieu buktosna"

Udin ngarandeg bari molohok melong batu dina leungeun Élsa, sabab éta mémang batu anu salila ieu keur ditéangan ku dirina.

"Ukur batu, naon kaitanna jeung kuring? Dimana mobil anjeun diparkir? Kuring rék balik" ceuk Udin méngparkeun obrolan bari rurat-rérét némpoan mobil anu parkir ngajajar di sisi jalan.

Élsa nyarita deui,

"Érwin anu masihan uninga ka abdi, batu ieu anu akang"

Udin nepak tarangna, sabab nyatana Érwin biang kérokna,

"Oké, mémang kuring anu nulungan anjeun di Papandayan. Tapi omat ulah nepi ka Icih nyahoeun" ceuk Udin ahirna ngaku.

Udin neruskeun leupangna nungtun sapédah ngajauhan pasar, tapi Élsa ngudag bari ngahalangan. Udin ngarandeg.

"Abdi bogoh ka akang" ceuk Élsa bari neuteup panon Udin.

Udin reuwas,

"Élsa, istighfar! Anjeun sobat Icih"

Élsa ngarebut sapédah ti Udin terus di surungkeun ka sisi jalan terus disetandarkeun. Terus Elsa malik, leungeun Udin dicekelan duanana. Anu katuhu diantelkeun kana dada Élsa.

"Rampa dada abdi anu ngageter ieu kang, abot kanggé istri ngucapkeun rasa suka ka pameget. Nanging kapaksa abdi kedah miceun kaisin supados akang uninga. Akang teu kedah ngahindar ti abdi, abdi uninga akang saha, akang teu kedah alit manah, teu kedah ngaraos rendah diri. abdi anggota ti kulawarga Wisesa. Abdi sanggem ngabahagiakeun salira lahir batin" ceuk Élsa sorana dumareuda.

Udin teu bisa ngarasakeun geteran nanaon dina dada Élsa sakumaha anu disebutkeun ku Élsa, anu puguh mah dampal leungeuna keur didedetkeun ku Élsa kana dadana nu ngejendol gedé bari hipu. Udin buburu metot lengeunna, mundur saléngkah bari luak-lieuk bisi aya batur anu nempoeun. Terus Udin tungkul.

"Élsa, mustahil. Kuring teu bisa khianat ka Icih"

Élsa nyarita deui,

"Ti kawit akang nulungan abdi anu munggaran, akang tos nyiksa abdi siang wengi. Tadi wengi malah abdi dugi ka teu tiasa kulem margi hoyong énggal-énggal ngedalkeun eusi haté ka akang. Ayeuna akang teu masihan harepan pisan ka abdi. Abdi kuciwa"

Udin seuri dina haténa. Saupama Élsa nyaho saha Udin anu sabenerna, pasti moal wani ngomong saperti ayeuna.

"Kuring dunungan anjeun Élsa, dina hal materi leuwih mampu ti anjeun" gerentes Udin.

"Teu sawios akang nolak abdi ayeuna, nanging ijinkeun abdi tetep bogoh ka salira. Abdi badé ngabuktoskeun yén abdi pantes dipikabohoh ku akang, abdi bakal nganggap akang bébéndé abdi sanaos akang teu kagungan rasa anu sami. Abdi nyalira di Bandung, akang ogé uninga dimana abdi. Ulah asa-asa sumpingan abdi upami akang ngaraos diteungteinganan ku Icih" ceuk Élsa bari ceurik, terus lumpat kana mobilna anu rada anggang.

Udin teu malire, tapi buburu naék kana sapédahna terus diboséh gancang balik ka Imah.

Dina jero mobil Élsa masih bisa neuteup tonggong Udin keur ngaboséh sapédahna anu rimbil ku balanjaan. Ngarasa watir nempo nasib lalaki anu dipikacintana balik balanja kaluar ti pasar bari ngaboséh sapédah. Terus ngabayangkeun tepi ka Imah Udin kudu masak, sasapu, ngepél, nyeuseuh jeung sajabana. Cerikna beuki tarik, Élsa jejeritan dina jero mobil tuluy ngagukguk kanyenyerian bari nyuuh kana setir.

Tepi ka imah Udin geus teu mikiran Élsa deui. Keur jongjon ngepél, Udin inget kana jangjina ka Tiandi jeung Soni rék méré ubar anu geus disampurnakeun téa. Keur maranéhna ubar jieunan udin ubar ajaib. Tapi keur Udin ubar éta ukur ubar level-1 anu aya dina Kitab Ghoib 9 Élmu Karuhun.

Udin mikir, lamun ubar level-1 waé boga kaampuhan kitu sarta dianggap ubar ajaib, komo lamun ubar level-9 diracik. Sigana bisa ngahirupkeun jelema paéh. Ngan mustahil, Udin gogodeg. Beuki luhur levelna, bahan-bahanna ogé beuki langka sarta beuki mahal. Dina ngajieunna ogé nguras énérgi spiritual anu kudu dikaluarkeun ku dirina. Jadi kudu dikeureuyeuh salevel-salevel.

Alesan Udin nyaggupan rék méré ubar anu geus dimurnikeun sabab Udin oge hayang nambah pangalamanna dina meraktékeunna. Hayang terus ngulik kabéh anu can kungsi dicobaan tina Kitab Ghoib 9 Élmu Karuhun.

Sabab keur ubar anu rék dijieun masih aya bahan anu kurang, ahirna Udin wani nelepon Warni pikeun mantuan néangan bahan ubar anu kurang éta. Warni tangtu moal kabeuratan sabab hasilna keur Akina.

Warni sorangan ahir-ahir ieu mémang keur néangan cara sangkan bisa leuwih deukeut deui jeung Udin. Saupama Udin daék jadi salakina geus tangtu Udin anu bakal jadi pawaris kabéh usaha milik Nataprawira sakumaha jangji Soni.

Kulawarga maung, kudu boga anak maung. Komo deui Warni can kungsi ngalaman boga kabogoh. Warni hayang Udin anu jadi kabogoh munggaran jeung saterusna. Anéh mémang, parawan kudu bogoh ka salaki batur, tapi perasaan teu bisa dibohongan. Matak pas nyaho Udin nelepon, haténa kacida bungah pisan.

"Kang, aya pikeresaeun naon?" Ceuk warni sorana ngageter.

Udin kerung. Sabab ieu kadua Kalina Warni nyebut dirina 'akang' deui,

"Tapi keun baé lah, sebutan akang masih wajar kadéngéna keur urang Sunda" Gerentes Udin.

Jadi Udin nyarita,

"Warni, kuring rék ngamurnikeun ubar téa, tapi aya sababaraha bahan anu kurang, anjeun bisa mantuan kuring neangan bahanna? terus kirimkeun ka imah kuring?"

Warni langsung sumanget ngadéngé Udin rék ngamurnikeun ubar, sabab Soni geus nanyakeun waé. Tapi karék ayeuna Udin ngabéjaan. Sararéa ukur bisa narungguan, euweuh anu wani nanyakeun, Matak ayeuna piraku paménta Udin teu disanggupan.

Jadi buburu Warni némbalan,

"Mangga kang, WA-keun ka abdi bahan-bahan anu diperyogikeunna. Abdi badé milari anu pangsaéna langsung dikintun ka bumi salira"

"Alus, mun bisa leuwihan jumlahna. Sabab sawaktu-waktu pasti bakal butuh deui" ceuk Udin sugema.

Udin teu butuh duit keur meuli bahan ubar sabab ayeuna duit Udin ogé loba. Tapi Udin butuh sumber séjén keur kahareupna anu bisa minuhan sagala pangabutuhna. ukur ngandelkeun Qin Gang jeung Warni tangtu masih can cukup.

Udin nutup teleponna, terus ngetik bahan-bahan ubar langsung dikirimkeun ka Warni. Ngan teu disangka ku udin, nyatana Warni ogé ménta bahan ubarna ka Qin Gang. Sabab di Bandung ukur Qin Gang anu bisnisna kana bahan ubar. Jadi chat ti Udin ku Warni di share deui ka Qin Gang.

Warni nelepon Qin Gang,

"Pak Qin, nembé abdi ngintun daftar nami bahan landong, pa Qin tiasa nyiapkeunna? Abdi peryogi seueur"

"Néng Warni peryogi bahan landong, tangtosna kanggé pa Udin pan?" Qin Gang nebak-nebak.

Warni némbalan,

"Muhun. Steven ogé pasti uningaeun pun aki ayeuna parantos séhat deui kumargi dilandongan ku pa Udin. Tah ayeuna pa Udin nuju peryogi bahan landong kanggé ngamurnikeun landong anu parantos didamel sateuacanna"

Qin Gang seuri,

"Neng Warni teu kedah salempang, sadayana badé disiapkeun sarta dikintun lansung ka bumi pa Udin"

"Teu kedah répot, wios kintun ka abdi wéh, sakantenan sareng tagihanna" ceuk Warni.

Nyambung...